Tattha sīlanti ācārasīlaṃ. Sirinti issariyaṃ. Satañca dhammanti sappurisadhammaṃ. Paññanti evaṃ imesaṃ catunnaṃ dhammānaṃ kataraṃ dhammaṃ seṭṭhataraṃ vadantīti pucchati. Paññā hīti sakka etesu catūsu dhammesu yā esā paññā nāma sāva seṭṭhā iti buddhādayo kusalā vadanti. Yathā hi tārakā candaṃ parivārenti candova nesaṃ uttamo evaṃ sīlañca siriñcāpi satañca dhammoti ete tayopi. Anvāyikā paññavato bhavantīti paññavantameva anugacchanti paññāya eva parivārā hontīti attho. Kathaṃkaroti ādīni aññamaññavevacanāneva. Kathaṃkaroti kinnāma kammaṃ karonto kimācaranto kiṃ sevamāno kiṃ bhajamāno idheva loke paññaṃ labhati paññāya meva paṭipadaṃ vadehi jānitukāmomhi kathaṃkaro macco paññavā nāma hotīti pucchati. Vuḍḍheti paññāvuḍḍhippatte paṇḍite. Nipuṇeti sukhumakāraṇajānanasamatthe. Evaṃkaroti yo puggalo evaṃ vuttappakāre puggale sevati bhajati payirupāsati pāliṃ uggaṇhati punappunaṃ atthaṃ pucchati pāsāṇe lekhaṃ khananto viya kāñcanacāṭiyā sīhavasaṃ sampaṭicchanto viya ohitasoto sakkaccaṃ subhāsitāni suṇāti ayaṃ evaṃkaro macco paññavā hotīti. Evaṃ Mahāsatto pācīnalokadhātuto suriyaṃ uṭṭhāpento viya paññāya paṭipadaṃ kathetvā idāni tassā paññāya guṇaṃ kathento sa paññavāti ādimāha. Tattha kāmaguṇeti kāmakoṭṭhāse hutvā abhāvaṭṭhena aniccato diṭṭhadhammikasamparāyikānaṃ dukkhānaṃ vatthubhāvena dukkhato aṭṭhanavutiyā rogadukkhānaṃ kāme nissāya uppannasambhavena rogato avekkhati oloketi. So evaṃvipassīti etehi kāraṇehi kāmānaṃ aniccādīni passanto kāme nissāya uppajjanakadukkhānaṃ anto natthi kāmānaṃ pahānameva sukhanti viditvā dukkhesu kāmesu mahabbhayesu chandaṃ pajahāti. Sa vītarāgoti sakka so puggalo evaṃ vītarāgo navaāghāṭavatthuvasena uppajjanakasabhāvadosaṃ vinetvā mettacittaṃ bhāveyya appamāṇasattārammaṇattā appamāṇaṃ bhāvetvā aparihīnajjhāno agarahito brahmaloke uppajjatīti.

Evaṃ mahāsatte kāmānaṃ dosaṃ kathenteyeva tesaṃ tiṇṇaṃpi rājūnaṃ sabalanikāyānaṃ tadaṅgappahānena pañcakāmaguṇarāgo pahīnoti. Taṃ ñatvā mahāsatto tesaṃ pahaṃsanavasena gāthamāha