Te tasmiṃpi kāle vedabbabrāhmaṇaṃ gahetvā bodhisattaṃ vissajjesuṃ. Bodhisatto ācariyaṃ vanditvā ahamekāhadvīhaccayena āgamissāmi tumhe mā bhāyittha apica kho pana mama vacanaṃ karotha ajja dhanavassāpanakanakkhattayogo bhavissati mā kho tumhe dukkhaṃ asahantā mantaṃ parivattetvā dhanaṃ vassāpayittha sace vassāpessatha tumhe ca vināsaṃ pāpuṇissatha ime pañcasatā corā ghātessantīti evaṃ ācariyaṃ ovaditvā dhanatthāya agamāsi. Corāpi suriye aṭṭhaṅgate brāhmaṇaṃ bandhitvā nipajjāpesuṃ. Taṃ khaṇaññeva pācīnalokadhātuto paripuṇṇacandamaṇḍalaṃ uṭṭhahi. Brāhmaṇo nakkhattaṃ olokento dhanavassāpanakanakkhattayogo laddho kiṃ me dukkhena anubhūtena mantaṃ parivattetvā ratanavassaṃ vassāpetvā corānaṃ dhanaṃ datvā yathāsukhaṃ gamissāmīti cintetvā core āmantesi bhonto corā tumhe maṃ kimatthāya gaṇhathāti. Dhanatthāya ācariyāti. Sace bho dhanena attho khippaṃ maṃ bandhanā mocetvā sīsaṃ nhāpetvā ahatavatthāni acchādāpetvā gandhehi vilimpāpetvā pupphāni pilandhāpetvā ṭhapethāti. Corā tassa kathaṃ sutvā tathā akaṃsu. Brāhmaṇo nakkhattayogaṃ ñatvā mantaṃ parivattetvā ākāsaṃ olokesi. Tāvadeva ākāsā ratanāni patiṃsu. Corā dhanaṃ saṅkaḍḍhitvā uttarāsaṅgesu bhaṇḍikaṃ katvā pāyiṃsu. Brāhmaṇopi tesaṃ pacchatova Agamāsi. Atha te core aññe pañcasatā corā gaṇhiṃsu. Kimatthaṃ amhe gaṇhathāti ca vutte dhanatthāyāti āhaṃsu. Yadi vo dhanenattho etaṃ brāhmaṇaṃ gaṇhatha eso ākāsaṃ oloketvā dhanaṃ vassāpeti amhākaṃ cetaṃ eteneva dinnanti. Corā core vissajjetvā amhākampi dhanaṃ dehīti brāhmaṇaṃ gaṇhiṃsu. Brāhmaṇo ahaṃ tumhākaṃ dhanaṃ dadeyyaṃ dhanavassāpanakanakkhattayogo pana ito saṃvaccharamatthake bhavissati yadi vo dhanena attho adhivāsetha tadā dhanavassaṃ vassāpessāmīti āha. Corā kujjhitvā ambho duṭṭhabrāhmaṇa aññesaṃ idāneva dhanaṃ vassāpetvā amhe aññaṃ saṃvaccharaṃ adhivāsāpesīti tiṇhena asinā brāhmaṇaṃ dvidhā chinditvā magge chaḍḍetvā vegena anubandhitvā tehi corehi saddhiṃ yujjhitvā te sabbepi māretvā dhanaṃ ādāya puna dve koṭṭhāsā hutvā aññamaññaṃ yujjhitvā aḍḍhateyyāni purisasatāni ghātetvā etenupāyena yāva dve janā avasiṭṭhā ahesuṃ tāva aññamaññaṃ ghātayiṃsu. Evantaṃ purisasahassaṃ vināsaṃ pattaṃ.