anupāyena yo atthaṃ icchati so vihaññati

cetā haniṃsu vedabbaṃ sabbe te byasanamajjhagunti.

Tattha so vihaññatīti so anupāyena attano atthaṃ vuḍḍhiṃ sukhaṃ icchāmīti akāle vāyāmaṃ karonto puggalo vihaññati kilamati mahāvināsaṃ pāpuṇāti. Cetāti cetiraṭṭhavāsino corā. Haniṃsu vedabbanti vedabbamantavasena vedabboti laddhanāmaṃ brāhmaṇaṃ haniṃsu. Sabbe te byasanamajjhagunti tepi ca sabbe anavasesā aññamaññaṃ ghātayamānā byasanaṃ adhigacchiṃsu paṭilabhiṃsu.

Evaṃ bodhisatto yathā amhākaṃ ācariyo anupāyena aṭṭhāne parakkamaṃ karonto dhanaṃ vassāpetvā attanāpi jīvitakkhayaṃ patto aññesañca pañcannampi janasatānaṃ vināsapaccayo jāto evameva yo aññopi anupāyena attano atthaṃ icchanto vāyāmaṃ karissati sabbo so attanāva vinassissati paresañca vināsapaccayo bhavissatīti vanaṃ unnādetvā devatāsu sādhukāraṃ dadamānāsu imāya gāthāya dhammaṃ desetvā taṃ dhanaṃ upāyena attano gehaṃ āharitvā dānādīni puññāni katvā yāvatāyukaṃ ṭhatvā jīvitapariyosāne saggapathaṃ pūrayamāno agamāsi.