Atīte bārāṇasiyaṃ brahmadatte rajjaṃ kārente bodhisatto rañño aggamahesiyā kucchimhi nibbatto. Tassa nāmagahaṇadivase sīlavakumāroti nāmaṃ akaṃsu. So soḷasavassuddesiko sabbasippesu nipphattiṃ patvā aparabhāge pitu accayena rajje patiṭṭhito mahāsīlavarājā nāma ahosi dhammiko dhammarājā. So nagarassa catūsu dvāresu catasso majjhe ekaṃ nivesanadvāre ekanti cha dānasālāyo kāretvā kapaṇaddhikānaṃ dānaṃ deti sīlaṃ rakkhati uposathakammaṃ karoti khantimettānuddayasampanno aṅke nisinnaṃ puttaṃ paritosayamāno Viya sabbasatte paritosayamāno dhammena rajjaṃ kāresi. Tasseko amacco antepure padussitvā aparabhāge pākaṭo jāto. Amaccā rañño ārocesuṃ. Rājā pariggaṇhanto attanā paccakkhato ñatvā taṃ amaccaṃ pakkosāpetvā andhabāla ayuttante kataṃ na tvaṃ mama vijite vasituṃ arahasi attano dhanañca puttadārañca gahetvā aññattha yāhīti raṭṭhā pabbājesi.

So kāsīraṭṭhaṃ atikkamma kosalajanapadaṃ gantvā kosalarājānaṃ upaṭṭhahanto anukkamena rañño abbhantare vissāsiko jāto. So ekadivasaṃ kosalarājānaṃ āha deva bārāṇasīrajjaṃ nāma nimmakkhikamadhupaṭalasadisaṃ rājā atimuduko appeneva balavāhanena sakkā bārāṇasīrajjaṃ gaṇhitunti. Rājā tassa vacanaṃ sutvā bārāṇasīrajjaṃ nāma mahā ayañca appeneva balavāhanena sakkā bārāṇasīrajjaṃ gaṇhitunti āha kiṃ nu kho payuttakacoro siyāti cintetvā payuttakosi maññeti āha. Nāhaṃ deva payuttako saccameva vadāmi sace me na saddahatha manusse pesetvā paccantagāmaṃ hanāpetha te manusse gahetvā attano santakaṃ corānaṃ dhanaṃ datvā vissajjessatīti. Rājā ayaṃ ativiya sūro hutvā kathesi vīmaṃsissāmi tāva nanti attano purise pesetvā bārāṇasīrañño paccantagāmaṃ hanāpesi. Te core gahetvā bārāṇasīrañño dassesuṃ. Rājā te disvā tātā kasmā gāmaṃ hanathāti pucchi. Jīvituṃ asakkontā devāti. Atha kasmā mama santikaṃ Na āgamittha itodāni paṭṭhāya evarūpaṃ mā karitthāti tesaṃ dhanaṃ datvā vissajjesi. Te gantvā kosalarañño taṃ pavuttiṃ ārocesuṃ. So ettakenāpi gantuṃ avisahanto puna majjhe janapadaṃ hanāpesi. Tepi core rājā tatheva dhanaṃ datvā vissajjesi. So ettakenapi agantvā puna pesetvā antaravīthiṃ vilumpāpesi. Rājāpi tesaṃ corānaṃ dhanaṃ datvā vissajjesiyeva. Tadā kosalarājā ativiya dhammiko rājāti ñatvā bārāṇasīrajjaṃ gahessāmīti balavāhanaṃ ādāya niyyāsi.