Tasmiṃ samaye corarājā alaṅkatasirigabbhe sirisayanapiṭṭhe nipanno niddāyati. Rājā tassa pamattassa niddāyantassa khaggatalena udaraṃ pahari. So bhīto pabujjhitvā dīpālokena sīlavamahārājānaṃ sañjānitvā sayanato uṭṭhāya satiṃ upaṭṭhapetvā ṭhito rājānaṃ āha mahārāja evarūpāya rattiyā gahitārakkhe pihitadvāre bhavane ārakkhamanussehi nirokāse ṭhāne khagagaṃ sannayhitvā Alaṅkatapaṭiyatto kathannāma tvaṃ imaṃ sayanapiṭṭhaṃ āgatoti. Rājā attano āgamanakāraṇaṃ sabbaṃ vitthārato kathesi. Taṃ sutvā corarājā saṃviggamānaso mahārāja ahaṃ manussabhūtopi samāno tumhākaṃ guṇe na jānāmi paresaṃ lohitamaṃsaṃ khādakehi pana kakkhaḷehi pharusehi yakkhehi tava guṇā ñātā na idānāhaṃ narinda evarūpe sīlasampanne tayi dubbhissāmīti khaggaṃ ādāya sapathaṃ katvā rājānaṃ khamāpetvā mahāsayane nipajjāpetvā attano khuddakamañcake nipajjitvā pabhātāya rattiyā uṭṭhite suriye bheriñcārāpetvā sabbaseniyo ca amaccabrāhmaṇagahapatike ca sannipātāpetvā tesaṃ purato ākāse puṇṇacandaṃ ukkhipanto viya sīlavarañño guṇe kathetvā parisamajjheyeva puna rājānaṃ khamāpetvā rajjaṃ paṭicchāpetvā ito paṭṭhāya tumhākaṃ uppanno corupaddavo mayhaṃ bhāro mayā gahitārakkhā tumhe rajjaṃ kārethāti vatvā pesuññakārakassa āṇaṃ katvā attano balavāhanaṃ ādāya sakaraṭṭhameva gato.

Sīlavamahārājāpi kho alaṅkatapaṭiyatto setacchattassa heṭṭhā sarabhapādake kāñcanapallaṅke nisinno attano sampattiṃ oloketvā ayañca evarūpā sampatti amaccasahassassa ca jīvitapaṭilābho mayi viriyaṃ akaronte kiñci na abhavissa viriyabalena panāhaṃ naṭṭhañca imaṃ yasañca paṭilabhiṃ amaccasahassassa ca jīvitadānaṃ adāsiṃ āsacchedaṃ vata akatvā viriyameva kattabbaṃ kataviriyassa hi phalaṃ nāma evaṃ samijjhatīti cintetvā udānavasena imaṃ gāthamāha

Āsiṃsetheva puriso na nibbindeyya paṇḍito

passāmi vohaṃ attānaṃ yathā icchiṃ tathā ahūti.