Atīte bārāṇasiyaṃ brahmadatte rajjaṃ kārente bodhisatto gandhāraraṭṭhe takkasilāyaṃ brāhmaṇakule nibbattitvā viññutaṃ patto tīsu vedesu sabbasippesu ca nipphattiṃ patto disāpāmokkho ācariyo ahosi. Tadā bārāṇasiyaṃ ekasmiṃ brāhmaṇakule puttassa jātadivaseyeva aggiṃ gahetvā anibbāyantaṃ ṭhapayiṃsu. Atha taṃ brāhmaṇakumāraṃ soḷasavassakāle mātāpitaro āhaṃsu puttaka mayaṃ tava jātadivase aggiṃ gahetvā ṭhapayimhā sace brahmalokaparāyano bhavitukāmo taṃ aggiṃ ādāya araññaṃ pavisitvā aggiṃ bhagavantaṃ namassanto brahmalokaparāyano hohi sace agāraṃ ajjhāvasitukāmo takkasilaṃ gantvā disāpāmokkhassa ācariyassa santike sippaṃ uggaṇhitvā Kuṭumbaṃ saṇṭhapehīti. Māṇavo nāhaṃ sakkhissāmi araññe aggiṃ paricarituṃ kuṭumbameva saṇṭhapessāmīti mātāpitaro vanditvā ācariyabhāgaṃ sahassaṃ gahetvā takkasilaṃ gantvā sippaṃ uggaṇhitvā paccāgami. Mātāpitaro panassa anatthikā gharāvāsena araññe aggiṃ paricarāpetukāmā honti. Atha naṃ mātā itthīnaṃ dosaṃ dassetvā araññaṃ pesetukāmā so ācariyo paṇḍito byatto sakkhissati me puttassa itthīnaṃ dosaṃ kathetunti cintetvā āha uggahitante tāta sippanti. Āma ammāti. Asātamantāpi te uggahitāti. Na uggahitā ammāti. Tāta yadi te asātamantā na uggahitā na nāma te sippaṃ uggahitaṃ gaccha uggaṇhitvā ehīti. So sādhūti puna takkasilābhimukho pāyāsi. Tassāpi ācariyassa mātā mahallikā vīsavassasatikā. So taṃ sahatthā nhāpento bhojento pāyento paṭijaggati. Aññe manussā naṃ tathākarontaṃ jigucchanti. So cintesi yannūnāhaṃ araññaṃ pavisitvā tattha mātaraṃ paṭijagganto vihareyyanti. Athekasmiṃ vivitte araññe udakaphāsukaṭṭhāne paṇṇasālaṃ kāretvā sappi taṇḍulādīni āharāpetvā mātaraṃ ukkhipitvā tattha gantvā mātaraṃ paṭijagganto vāsaṃ kappesi.
Sopi kho māṇavo takkasilaṃ gantvā ācariyaṃ apassanto kahaṃ ācariyoti pucchitvā taṃ pavuttiṃ sutvā tattha gantvā vanditvā aṭṭhāsi. Atha naṃ ācariyo kiṃ nu kho tāta atisīghaṃ āgatosīti. Nanu ahaṃ tumhehi asātamanto nāma uggaṇhāpitoti. Ko pana Te asātamante uggaṇhitabbe katvā kathesīti. Mayhaṃ mātā ācariyāti. Bodhisatto cintesi asātamantā nāma keci natthi imassa pana mātā imaṃ itthīdosaṃ jānāpetukāmā bhavissatīti. Atha naṃ sādhu tāta dassāmi te asātamante tvaṃ ajjādiṃ katvā mama ṭhāne ṭhatvā mama mātaraṃ sahatthā nhāpento bhojento pāyento paṭijaggāhi hatthapādasīsapiṭṭhisambāhanādīni cassā karonto ayye jaraṃ pattakālepi tāva te evarūpaṃ sarīraṃ daharakāle kīdisaṃ ahosīti parikammakaraṇakāle hattha pādādīnaṃ vaṇṇaṃ katheyyāsi yañca te mama mātā katheti taṃ alajjanto anigūhanto mayhaṃ ārocesi evaṃ karonto asātamante lacchasi akaronto na lacchasīti. So sādhu ācariyāti tassa vacanaṃ sampaṭicchitvā tato paṭṭhāya sabbaṃ yathāvuttavidhānaṃ akāsi. Athassā tasmiṃ māṇave punappunaṃ vaṇṇayamāne ayaṃ mayā saddhiṃ abhiramitukāmo bhavissatīti andhāya jarājiṇṇāya abbhantare kileso uppajji. Sā ekadivasaṃ attano sarīravaṇṇaṃ kathayamānaṃ māṇavaṃ āha mayā saddhiṃ abhiramituṃ icchasīti. Ayye ahaṃ atiiccheyyaṃ ācariyo pana garukoti. Sace maṃ icchasi puttaṃ me mārehīti. Ahaṃ ācariyassa santike ettakaṃ sippaṃ uggaṇhitvā kilesamattaṃ nissāya kinti katvā ācariyaṃ māressāmīti. Tenahi sace maṃ na pariccajasi ahameva naṃ māressāmīti. Evaṃ itthiyo nāma asātā lāmikā pacchimikā tathārūpe nāma vaye ṭhitā rāgacittaṃ uppādetvā kilesaṃ anuvattamānā evaṃupakāraṃ puttaṃ māretukāmā jātā.