tāsu yo vissase poso so naresu narādhamoti.

Lokitthiyoti loke itthiyo. Velā tāsaṃ na vijjatīti amma tāsaṃ itthīnaṃ kilesuppattiṃ patvā velā saṃvaro mariyādā pamāṇannāma natthi. Sārattā ca pagabbhā cāti velā ca Etāsaṃ natthi pañcasu kāmaguṇesu sārattā allīnā tathā kāyapāgabbhiyena vācāpāgabbhiyena manopāgabbhiyenāti tividhena pāgabbhiyena samannāgatattā pagabbhā cetā. Etāsaṃ hi abbhantare kāyadvārādīni patvā saṃvaro nāma natthi lolā kākappaṭibhāgāti dasseti. Sikhī sabbaghaso yathāti amma yathā jālasikhāya sikhīti saṅkhyaṃ gato aggi nāma gūthagatādibhedaṃ asucimpi sappimadhuphāṇitādibhedaṃ sucimpi iṭṭhampi aniṭṭhampi yaṃ yadeva labhati sabbaṃ ghasati khādati tasmā sabbaghasoti vuccati tatheva itthiyopi hatthimeṇḍagomeṇḍādayo vā hontu hīnajaccā hīnakammantā khattiyādayo vā hontu uttamakammantā hīnukkaṭṭhabhāvaṃ acintetvā lokassādavasena kilesasanthave uppanne yaṃ yaṃ labhanti sabbameva sevantīti sabbaghasasikhisadisāva honti tasmā sikhī sabbaghaso yathā tathevetāti veditabbā. Tā hitvā pabbajissāmīti ahaṃ tā lāmikā dukkhavatthubhūtā itthiyo hitvā araññaṃ pavisitvā isipabbajjaṃ pabbajissāmi. Vivekamanubrūhayanti kāyaviveko cittaviveko upadhivivekoti tayo vivekā tesu idha kāyavivekopi vaṭṭati cittavivekopi. Idaṃ vuttaṃ hoti ahaṃ amma pabbajitvā kasiṇaparikammaṃ katvā aṭṭha samāpattiyo pañca abhiññāyo ca uppādetvā gaṇato kāyaṃ kilesehi ca cittaṃ vivecetvā imaṃ vivekaṃ brūhanto vaḍḍhento brahmalokaparāyano bhavissāmi alaṃ me agārenāti.

Evaṃ itthiyo garahitvā mātāpitaro vanditvā pabbajitvā Vuttappakāraṃ vivekaṃ brūhanto brahmalokaparāyano ahosi.

Satthāpi evaṃ bhikkhu itthiyo nāma asātā lāmikā pacchimikā dukkhadāyikāti itthīnaṃ aguṇaṃ kathetvā saccāni pakāsesi. Saccapariyosāne so bhikkhu sotāpattiphale patiṭṭhāsi. Satthā anusandhiṃ ghaṭetvā jātakaṃ samodhānesi tadā mātā bhaddakāpilānī pitā mahākassapo ahosi antevāsiko ānando ācariyo pana ahamevāti.