sabbā nadī vaṅkagatā sabbe kaṭṭhamayā vanā
sabbitthiyo kare pāpaṃ labbhamāne nivātaketi imaṃ jūtagītaṃ gāyanto rajataphalake suvaṇṇapāsake khipati. Evaṃ kīḷanto pana rājā niccaṃ jināti. Purohito pana parājīyati. So anukkamena gharavibhave parikkhayaṃ gacchante cintesi evaṃ sante sabbaṃ imasmiṃ ghare dhanaṃ khīyissati pariyesitvā purisantaraṃ agataṃ ekaṃ mātugāmaṃ ghare karissāmīti. Athassa etadahosi aññapurisaṃ diṭṭhapubbaṃ itthiṃ rakkhituṃ na sakkhissāmi gabbhato paṭṭhāyekaṃ mātugāmaṃ rakkhitvā taṃ vayappattaṃ vase ṭhapetvā ekapurisikaṃ katvā gāḷhaṃ ārakkhaṃ saṃvidahitvā rājakulato dhanaṃ āharissāmīti. So ca aṅgavijjāya cheko hoti athekaṃ duggatitthiṃ gabbhiniṃ disvā dhītaraṃ vijāyissatīti ñatvā taṃ pakkosāpetvā paribbayaṃ datvā ghareyeva vasāpetvā vijātakāle dhanaṃ datvā uyyojetvā taṃ kumārikaṃ aññesaṃ purisānaṃ daṭṭhuṃ adatvā itthīnaṃyeva hatthe datvā posāpetvā vayappattakāle taṃ attano vase ṭhapesi yāva cesā na vaḍḍhati tāva raññā saddhiṃ jūtaṃ na kīḷati tampana vase ṭhapetvā mahārāja jūtaṃ kīḷāmāti āha. Rājā sādhūti purimaniyāmeneva kīḷi. Purohito rañño gāyitvā pāsakaṃ khipanakāle ṭhapetvā māṇavikanti āha. Tato paṭṭhāya purohito jināti. Rājā parājīyati.
Bodhisatto imassa ghare ekapurisikāya ekāya itthiyā Bhavitabbanti pariggaṇhāpento atthibhāvaṃ ñatvā sīlamassā bhindāpessāmīti ekaṃ dhuttaṃ pakkosāpetvā sakkhissasi purohitassa itthiyā sīlaṃ bhinditunti āha. Sakkomi devāti. Athassa rājā dhanaṃ datvā tenahi khippaṃ niṭṭhāpehīti taṃ pahiṇi. So rañño santikā dhanaṃ ādāya gandhadhūpacuṇṇakappurādīni gahetvā tassa gharato avidūre sabbagandhāpaṇaṃ pasāresi. Purohitassāpi gehaṃ sattabhūmikaṃ sattadvārakoṭṭhakaṃ hoti. Sabbesu ca dvārakoṭṭhakesu itthīnaññeva ārakkhā ṭhapetvā pana brāhmaṇaṃ añño puriso gehaṃ pavisituṃ labhanto nāma natthi. Kacavarachaḍḍanapacchiṃpi sodhetvāyeva pavesenti. Taṃ māṇavikaṃ purohito ceva daṭṭhuṃ labhati tassā ca ekā paricārikā itthī. Athassā paricārikā gandhapupphamūlaṃ gahetvā gacchantī tassa dhuttassa āpaṇasamīpena gacchati. So ayaṃ tassā paricārikāti suṭṭhu ñatvā ekadivasaṃ taṃ āgacchantiṃ disvā āpaṇā vuṭṭhāya gantvā tassā pādamūle patitvā ubhohi passehi pāde gāḷhaṃ gahetvā amma ettakaṃ kālaṃ kahaṃ gatāsīti paridevi. Avasesāpi payuttakadhuttā ekamantaṃ ṭhatvā hatthapādamukhasaṇṭhānehi ca ākappena ca mātāputtā ekasadisāyevāti āhaṃsu. Sā itthī tesu tesu kathentesu attano saddahitvā ayaṃ me putto bhavissatīti sayampi rodituṃ ārabhi. Te ubhopi kanditvā aññamaññaṃ āliṅgitvā aṭṭhaṃsu.