Atha so dhutto āha amma kahaṃ vasasīti. Kinnarīlīḷhāya Samānāya rūpasobhaggappattāya purohitassa daharitthiyā upaṭṭhānaṃ kurumānā vasāmi tātāti. Idāni kahaṃ yāsi ammāti. Tassā gandhamālādīnaṃ atthāyāti. Amma kinte aññattha gatena ito paṭṭhāya mameva santakaṃ harāti mūlaṃ agahetvā bahūni tambūlatakkolakādīni ceva nānāpupphāni ca adāsi. Māṇavikā bahūni gandhapupphādīni disvā kiṃ amma ajja amhākaṃ brāhmaṇo pasannoti āha. Kasmā evaṃ vadasīti. Imesaṃ bahubhāvaṃ disvāti. Na brāhmaṇo bahuṃ mūlaṃ adāsi mayā panetaṃ mayhaṃ puttassa santikā ābhatanti. Tato paṭṭhāya sā brāhmaṇena dinnamūlaṃ attanāva gahetvā tasseva santikā gandhapupphādīni āharati. Dhutto katipāhaccayena gilānālayaṃ katvā nipajji. Sā tassa āpaṇadvāraṃ gantvā taṃ adisvā kahaṃ me puttoti pucchi. Puttassa te aphāsukaṃ jātanti. Sā tassa nipannaṭṭhānaṃ gantvā nisīditvā piṭṭhiṃ parimajjantī kiṃ te tāta aphāsukanti pucchi. So tuṇhī ahosi. Kiṃ na kathesi puttāti. Amma marantenāpi tuyhaṃ kathetuṃ na sakkāti. Mayhaṃ akathetvā kassa katheyyāsi kathehi tātāti. Amma mayhaṃ aphāsukaṃ natthi tassā pana māṇavikāya vaṇṇaṃ sutvā paṭibaddhacittosmi jāto taṃ labhanto jīvissāmi alabhanto idheva marissāmīti. Tāta mayhaṃ esa bhāro mā tvaṃ etaṃ nissāya cintayīti taṃ assāsetvā bahūni gandhapupphādīni ādāya māṇavikāya santikaṃ gantvā putto me amma mama Santikā tava vaṇṇaṃ sutvā paṭibaddhacitto jāto kiṃ kātabbanti. Sace ānetuṃ sakkotha mayā katokāsoyevāti. Sā tassā vacanaṃ sutvā tato paṭṭhāya tassa gehassa kaṇrakaṇṇehi bahuṃ kacavaraṃ saṅkaḍḍhitvā ārakkhitthiyā upari chaḍḍeti. Sā tena aṭṭiyamānā apeti. Iti sā teneva niyāmena yā yā kiñci katheti tassā tassā upari kacavaraṃ chaḍḍesi. Tato paṭṭhāya yaṃ sā āharati vā nīharati vā taṃ na kāci sodhetuṃ ussahati.
Tasmiṃ kāle sā taṃ dhuttaṃ pupphapacchiyaṃ nipajjāpetvā māṇavikāya santikaṃ abhihari. Dhutto māṇavikāya sīlaṃ bhindi ekāhadvīhaṃ pāsādeyeva ahosi. Purohite bahi nikkhante ubho abhiramanti. Tasmiṃ āgate dhutto nilīyati. Atha naṃ sā ekāhadvīhaccayena sāmi idāni tava gantuṃ vaṭṭatīti āha. Ahaṃ brāhmaṇaṃ paharitvā gantukāmoti. Sā evaṃ hotūti dhuttaṃ nilīyāpetvā brāhmaṇe āgate evamāha ahaṃ ayya tumhesu vīṇaṃ vādentesu naccituṃ icchāmīti. Sādhu bhadde naccassūti vīṇaṃ vādesi. Tumhesu olokentesu lajjāmi mukhaṃ pana te sāṭakena bandhitvā naccissāmīti. Sace lajjasi evaṃ karohīti. Māṇavikā ghanasāṭakaṃ gahetvā tassa akkhīni pidahamānā mukhaṃ bandhi. Brāhmaṇo mukhaṃ bandhāpetvā vīṇaṃ vādesi. Sā muhuttaṃ naccitvā ayya ahaṃ te ekavāraṃ sīse paharitukāmāti āha. Itthīlolo brāhmaṇo kiñci kāraṇaṃ ajānanto paharāhīti āha. Māṇavikā dhuttassa saññaṃ Adāsi. So santikaṃ āgantvā brāhmaṇassa piṭṭhipasseva ṭhatvā sīse kappurena pahari. Akkhīni patanākārappattāni ahesuṃ. Sīse gaṇḍo uṭṭhahi. So vedanāppatto hutvā āhara te hatthanti āha. Māṇavikā attano hatthaṃ ukkhipitvā tassa hatthe ṭhapesi. Brāhmaṇo hattho muduko pahāro pana thaddhoti āha. Dhutto brāhmaṇaṃ paharitvā nilīyi. Māṇavikā tasmiṃ nilīyante brāhmaṇassa mukhato sāṭakaṃ mocetvā telaṃ ādāya sīsaṃ parisambāhi. Brāhmaṇe bahi nikkhante puna sā itthī dhuttaṃ pacchiyaṃ nipajjāpetvā nīhari. So rañño santikaṃ gantvā sabbaṃ taṃ pavuttiṃ ārocesi.