Rājā attano upaṭṭhānaṃ āgataṃ brāhmaṇaṃ āha jūtaṃ kīḷāma brāhmaṇāti. Sādhu mahārājāti. Rājā jūtamaṇḍalaṃ sajjāpetvā purimanayeneva jūtagītaṃ gāyitvā pāsake khipati. Brāhmaṇo māṇavikāya tapassa bhinnabhāvaṃ ajānanto ṭhapetvā māṇavikanti āha. Evaṃ vadantopi parājitoyeva. Rājā jinitvā tvaṃ brāhmaṇa kiṃ vadesi māṇavikāya te tapo bhinno tvaṃ mātugāmaṃ gabbhato paṭṭhāya rakkhanto sattasu ṭhānesu ārakkhaṃ karonto rakkhissāmīti maññasi mātugāmo nāma kucchiyaṃ pakkhipitvā carantenāpi rakkhituṃ na sakkā ekapurisikā itthī nāma natthi tava māṇavikā naccitukāmāmhīti vatvā vīṇaṃ vādentassa tava sāṭakena mukhaṃ bandhitvā attano jāraṃ tava sīse kappurena paharāpetvā uyyojesi idāni Kiṃ ṭhapesīti vatvā imaṃ gāthamāha

yaṃ brāhmaṇo avādesi vīṇaṃ sammukhaveṭhito

aṇḍabhūtā bhatā bhariyā tāsu ko jātu vissaseti.

Tattha yaṃ brāhmaṇo avādesi vīṇaṃ sammukhaveṭhitoti yena kāraṇena brāhmaṇo ghanasāṭakena saha mukhena veṭhito hutvā vīṇaṃ vādesi taṃ kāraṇaṃ na jānātīti attho. Tañhi sā vañcetukāmā evamakāsi. Brāhmaṇo pana taṃ itthīnaṃ bahumāyābhāvaṃ ajānanto mātugāmassa saddahitvā maṃ esā lajjatīti evaṃsaññī ahosi tenassa aññāṇabhāvaṃ pakāsento rājā evamāha ayamettha adhippāyo. Aṇḍabhūtā bhatā bhariyāti aṇḍaṃ vuccati bījaṃ bījabhūtā mātu kucchito anikkhantakāleyeva ābhatā ānītā. Bhatāti vā puṭṭhāti attho. Kā sā. Bhariyā pajāpati pādaparicārikā. Sā hi bhattavatthādīhi bharitabbatāya bhinnasaṃvaratāya lokadhammehi bharitabbatāya ca bhariyāti vuccati. Tāsu ko jātu vissaseti jātūti ekaṃsādhivacanaṃ. Tāsu mātu kucchito paṭṭhāya rakkhiyamānāsupi evaṃ vikāraṃ āpajjantīsu bhariyāsu ko nāma paṇḍito puriso ekaṃsena vissase nibbikārā etā mayīti ko saddaheyyāti attho. Asaddhammavasena hi āmantakesu nimantakesu vijjamānesu mātugāmo nāma na sakkā rakkhitunti.