Tatrāyaṃ piṇḍattho bhikkhu itthiyo nāmetā kodhanā uppannakodhaṃ nivāretuṃ na sakkonti akataññū ca atimahantampi upakāraṃ na jānanti pisuṇā ca pesuññabhāvakaraṇameva kathaṃ kathenti vibhedikā mitte bhindanti mittabhedanakathaṃ kathanasīlāyeva evarūpehi pāpadhammehi samannāgatā etā kinte etāhi brahmacariyaṃ cara bhikkhu ayaṃ hi methunavirati parisuddhaṭṭhena brahmacariyaṃ nāma taṃ cara. So sukhaṃ na vihāhisīti so tvaṃ etaṃ brahmacariyavāsaṃ vasanto jhānasukhaṃ maggasukhaṃ phalasukhañca na vihāhisi etaṃ sukhaṃ na vijahissasi etasmā sukhā na parihāyissasīti attho. Na parihāyasītipi pāṭho ayameva attho.

Satthā imaṃ dhammadesanaṃ āharitvā saccāni pakāsesi. Saccapariyosāne ukkaṇṭhitabhikkhu sotāpattiphale patiṭṭhahi. Satthāpi jātakaṃ samodhānesi tadā corajeṭṭhako ānando ahosi takkapaṇḍito pana ahamevāti.

Takkajātakaṃ tatiyaṃ.