Bodhisatto rañño gatakālato paṭṭhāya attano rucanavelāya gehaṃ gacchati. Athekadivasaṃ mudulakkhaṇā bodhisattassa āhāraṃ sampādetvā ajja ayyo cirāyatīti gandhodakena nhāyitvā sabbālaṅkārapaṭimaṇḍitā mahātale cūḷasayanaṃ paññapetvā bodhisattassa āgamanaṃ olokayamānā nipajji. Bodhisattopi attano velaṃ sallakkhetvā jhānā vuṭṭhāya ākāseneva rājanivesanaṃ agamāsi. Mudulakkhaṇā vākacīrasaddaṃ sutvā ayyo āgatoti vegena uṭṭhahi. Tassā vegena uṭṭhahantiyā maṭṭhasāṭako bhassi. Tāpaso sīhapañjarena pavisanto deviyā visabhāgarūpārammaṇaṃ disvā indriyāni bhinditvā subhavasena olokesi. Athassa abbhantare kileso cali vāsiyā pahaṭakhīrarukkho viya ahosi. Tāvadevassa jhānaṃ antaradhāyi. Chinnapakkho kāko viya ahosi. So ṭhitakova āhāraṃ gahetvā abhuñjitvā kilesehi kampito pāsādā oruyha uyyānaṃ gantvā paṇṇasālaṃ pavisitvā phalakattharakasayanassa heṭṭhā āhāraṃ ṭhapetvā visabhāgārammaṇabandho kilesagginā dayhamāno nirāhāratāya sussamāno satta divasāni phalakattharake nipajji.
Sattame divase rājā paccantaṃ vūpasametvā āgato nagaraṃ padakkhiṇaṃ katvā nivesanaṃ agantvāva ayyaṃ passissāmīti uyyānaṃ gantvā paṇṇasālaṃ pavisitvā taṃ nipannakaṃ disvā ekaṃ aphāsukaṃ jātaṃ maññeti paṇṇasālaṃ sodhāpetvā pāde parimajjanto kiṃ ayyassa aphāsukanti pucchi. Mahārāja aññaṃ me aphāsukaṃ natthi kilesavasena panamhi paṭibaddhacitto jātoti. Kahaṃ paṭibaddhante ayya cittanti. Mudulakkhaṇāya mahārājāti. Sādhu ayya ahaṃ mudulakkhaṇaṃ tumhākaṃ dammīti tāpasaṃ ādāya nivesanaṃ pavisitvā deviṃ sabbālaṅkārapaṭimaṇḍitaṃ katvā tāpasassa adāsi dadamānoyeva ca mudulakkhaṇāya saññaṃ adāsi tayā attano balena ayyaṃ rakkhituṃ vāyamitabbanti. Sādhu deva rakkhissāmīti. Tāpaso deviṃ gahetvā rājanivesanā otari. Atha naṃ mahādvārato nikkhantakāle ayya amhākaṃ gehaṃ laddhuṃ vaṭṭati gaccha rājānaṃ gehaṃ yācāhīti āha. Tāpaso gantvā gehaṃ yāci. Rājā manussānaṃ vaccakuṭikiccaṃ sādhayamānaṃ ekaṃ chaḍḍitagehaṃ dāpesi. So deviṃ gahetvā tattha agamāsi. Sā pavisituṃ na icchi. Kiṃkāraṇā na pavisasīti. Asucibhāvenāti. Idāni kiṃ karomīti. Paṭijaggāhi nanti vatvā rañño santikaṃ pesetvā gacchakuddālaṃ āhara pacchiṃ āharāti āharāpetvā asuciñca saṅkārañca chaḍḍāpetvā gomayaṃ āharāpetvā vilimpāpetvā punapi gaccha mañcaṃ āhara pīṭhaṃ āharāti ekamekaṃ āharāpetvā puna udakāharaṇādīnaṃ atthāya āṇāpesi. So ghaṭaṃ ādāya udakaṃ āharitvā cāṭiṃ pūretvā nhānodakaṃ sajjetvā sayanaṃ atthari. Atha naṃ sayane ekato nisinnaṃ phāsukāsu gahetvā ākaḍḍhitvā tava samaṇabhāvaṃ vā brāhmaṇabhāvaṃ vā na jānāsīti onāmetvā attano abhimukhaṃ ākaḍḍhi. So tasmiṃ kāle satiṃ paṭilabhi. Ettakampana kālaṃ aññāṇī ahosi. Evaṃ aññāṇakaraṇā kilesā nāma kāmacchandanīvaraṇaṃ bhikkhave andhakaraṇaṃ aññāṇakaraṇanti ādi cettha vattabbaṃ. So satiṃ paṭilabhitvā cintesi ayaṃ taṇhā vaḍḍhamānā mama catūhi upāyehi sīsaṃ ukkhipituṃ na dassati ajjeva mayā imaṃ rañño niyyādetvā himavantaṃ pavisituṃ vaṭṭatīti. So taṃ ādāya rājānaṃ upasaṅkamitvā mahārāja tava deviyā mayhaṃ attho natthi kevalaṃ me imaṃ nissāya taṇhā vaḍḍhitāti vatvā imaṃ gāthamāha