tañca desaṃ na passāmi yato sodariyamānayeti. Tattha ucchaṅge deva me puttoti deva mayhaṃ putto ucchaṅgeyeva yathā hi araññaṃ pavisitvā ucchaṅgaṃ katvā ḍākaṃ uccinitvā tattha pakkhipantiyā ucchaṅge ḍākannāma sulabhaṃ hoti evaṃ itthiyāpi putto sulabho ucchaṅge ḍākasadisova tena vuttaṃ ucchaṅge deva me puttoti. Pathe dhāvantiyā patīti maggaṃ āruyha ekikāya gacchamānāyapi itthiyā pati nāma sulabho diṭṭhadiṭṭheyeva hoti tena vuttaṃ pathe dhāvantiyā patīti. Tañca desaṃ na passāmi yato sodariyamānayeti yasmā pana me mātāpitaro natthi tasmā idāni taṃ mātukucchisaṅkhātaṃ aññaṃ desaṃ na passāmi yatohaṃ samāne udare jātattā saudariyasaṅkhātaṃ bhātaraṃ āneyya tasmā bhātaraṃyeva me dethāti.

Rājā saccaṃ esā vadatīti tuṭṭhacitto tayopi jane bandhanāgārato ānetvā adāsi . sā tayopi jane gahetvā gatā.

Satthāpi na bhikkhave idāneva pubbepesā ime tayo jane dukkhato mocesiyevāti imaṃ dhammadesanaṃ āharitvā anusandhiṃ ghaṭetvā jātakaṃ samodhānesi atīte cattārova etarahi cattāro rājā pana ahameva tena samayenāti.

Ucchaṅgajātakaṃ sattamaṃ.