9. Visavantajātakaṃ

dhiratthu taṃ visaṃ vantanti idaṃ satthā jetavane viharanto dhammasenāpatiṃ ārabbha kathesi.

Therassa kira piṭṭhakhajjakakhādanakāle manussā saṅghassa bahuṃ piṭṭhakhādanīyaṃ gahetvā vihāraṃ āgamiṃsu. Bhikkhusaṅghassa gahitāvasesaṃ bahuṃ atirittaṃ ahosi . manussā bhante antogāmagatānampi gaṇhathāti āhaṃsu. Tasmiṃ khaṇe therassa saddhivihārikadaharo antogāmaṃ gato hoti. Tattha koṭṭhāsaṃ gahetvā tasmiṃ anāgacchante atidivā hotīti therassa adaṃsu. Therena tasmiṃ paribhutte daharo agamāsi. Atha naṃ thero mayaṃ āvuso tuyhaṃ ṭhapitakhādanīyaṃ paribhuñjimhāti āha. So madhurannāma bhante kassa appiyanti āha. Mahātherassa saṃvego uppajji. So ito paṭṭhāya piṭṭhakhādanīyaṃ na khādissāmīti adhiṭṭhahi. Tato paṭṭhāya kira sārīputtattherena piṭṭhakhādanīyaṃ nāma na khāditapubbaṃ. Tassa piṭṭhakhādanīyaṃ akhādanabhāvo bhikkhusaṅghe pākaṭo jāto. Bhikkhū taṃ kathaṃ kathentā dhammasabhāyaṃ nisīdiṃsu. Atha satthā kāya nuttha bhikkhave etarahi kathāya sannisinnāti pucchitvā imāya nāmāti vutte na bhikkhave sārīputto ekavāraṃ jahitakaṃ jīvitaṃ pariccajantopi puna gaṇhatiyevāti vatvā atītaṃ āhari.

Atīte bārāṇasiyaṃ brahmadatte rajjaṃ kārente bodhisatto Visavejjakule nibbattitvā vejjakammena jīvikaṃ kappesi. Athekaṃ janapadamanussaṃ sappo ḍaṃsi. Tassa ñātakā pamādaṃ akatvā khippaṃ vejjaṃ ānayiṃsu. Vejjo kiṃ tāva osadhena paribhāvitvā visaṃ harāmi daṭṭhasappaṃ āvāhetvā daṭṭhaṭṭhānato teneva visaṃ ākaḍḍhāpemīti āha. Sappaṃ āvāhetvā visaṃ ākaḍḍhāpehīti. So sappaṃ āvāhetvā tayā ayaṃ daṭṭhoti āha. Āma mayāti. Tayā daṭṭhaṭṭhānato tvaṃyeva mukhena visaṃ ākaḍḍhāhīti. Mayā ekavāraṃ jahitakaṃ puna na gahitapubbaṃ nāhaṃ mayā jahitaṃ visaṃ ākaḍḍhissāmīti. So dārūni āharāpetvā aggiṃ katvā sace attano visaṃ nākaḍḍhasi imaṃ aggiṃ pavisāti. Sappopi aggiṃ pavisāmi na cattanā ekavāraṃ jahitaṃ visaṃ paccāvamissāmīti vatvā imaṃ gāthamāha