Atīte gandhāraraṭṭhe takkasilāyaṃ bodhisatto disāpāmokkho ācariyo hutvā pañca māṇavakasatāni sippaṃ uggaṇhāpesi. Athassa te māṇavakā ekadivasaṃ dāruāharaṇatthāya araññaṃ gantvā Dārūni uddhariṃsu. Tesaṃ antare eko kusītamāṇavo mahantaṃ varaṇarukkhaṃ disvā sukkharukkho esoti saññāya muhuttaṃ tāva nipajjitvā pacchā rukkhaṃ abhiruhitvā dārūni pātetvā ādāya gamissāmīti uttarasāṭakaṃ paṭṭharitvā nipajjitvā kākacchamāno niddaṃ okkami. Itare māṇavakā dārukalāpe bandhitvā ādāya gacchantā taṃ pādena piṭṭhiyaṃ paharitvā pabodhetvā agamiṃsu. Kusītamāṇavo uṭṭhāya akkhīni puñchitvā avigataniddo varaṇarukkhaṃ abhiruhitvā sākhaṃ gahetvā attano abhimukhaṃ ākaḍḍhitvā bhañjanto bhijjitvā uṭṭhitakoṭiyā attano akkhiṃ bhindāpetvā ekena hatthena taṃ pidhāya ekena hatthena alladārūni bhañjitvā rukkhato oruyha dārukalāpaṃ bandhitvā ukkhipitvā vegena gantvā tehi pātitānaṃ dārūnaṃ upari pātesi. Taṃ divasañca janapadagāmakato ekaṃ kulaṃ sve brāhmaṇavācakaṃ karissāmāti ācariyaṃ nimantesi. Ācariyo māṇavake āha tātā sve ekaṃ gāmakaṃ gantabbaṃ tumhe pana nirāhārā na sakkhissatha gantuṃ pātova yāguṃ pacāpetvā tattha gantvā attanā laddhakoṭṭhāsañca amhākaṃ pattakoṭṭhāsañca sabbaṃ ādāya āgacchathāti. Te pātova yāgupacanatthāya dāsiṃ uṭṭhāpetvā khippaṃ no yāguṃ pacāhīti āhaṃsu. Sā dārūni gaṇhantī upariṭṭhitāni allavaraṇadārūni gahetvā punappunaṃ mukhavātaṃ dadamānāpi aggiṃ ujjāletuṃ asakkontī suriyaṃ uṭṭhāpesi. Māṇavakā atidivā jātā idāni na sakkā gantunti ācariyassa santike agamaṃsu. Ācariyo kiṃ tātā na gatatthāti. Āma ācariya na gatamhāti. Kiṃkāraṇāti. Asuko nāma kusītamāṇavo amhehi saddhiṃ dārūnaṃ atthāya araññaṃ gantvā varaṇarukkhamūle niddāyitvā pacchā vegenāruhitvā akkhīni bhindāpetvā allavaraṇadārūni āharitvā amhehi ānītadārūnaṃ upari pakkhipi yāgupācikā tāni sukkhadārusaññāya gahetvā yāva suriyuggamanā ujjāletuṃ nāsakkhi iminā kāraṇena gamanantarāyo jātoti. Ācariyo māṇavena katakammaṃ sutvā andhabālānaṃ kammaṃ nissāya evarūpā parihāni hotīti vatvā imaṃ gāthamāha