Bodhisattopi kho tasmiṃ kāle kāsīraṭṭhe udiccabrāhmaṇakule Nibbattitvā vuḍḍhippatto isipabbajjaṃ pabbajitvā ekasmiṃ nadīnivattane paṇṇasālaṃ māpetvā vasati. So aḍḍharattikasamaye caṅkamamāno tassa rājakumārassa balavaparidevanasaddaṃ sutvā cintesi mādise nāma mettānuddayasampanne tāpase vasante etassa purisassa maraṇaṃ ayuttaṃ udakato uddharitvā tassa jīvitadānaṃ dassāmīti. So taṃ mā bhāyīti assāsetvā udakasotaṃ chindanto gantvā taṃ dārukkhandhaṃ ekāya koṭiyā gahetvā ākaḍḍhanto nāgabalo thāmasampanno ekavegena nadītīraṃ patvā kumāraṃ ukkhipitvā tīre patiṭṭhāpesi. Te sappādayo disvā ukkhipitvā assamapadaṃ netvā aggiṃ jāletvā ime dubbalatarāti paṭhamaṃ sappādīnaṃ sarīraṃ sedetvā pacchā rājakumārassa sarīraṃ sedetvā tampi arogaṃ katvā āhāraṃ dentopi paṭhamaṃ sappādīnameva datvā pacchā tassa phalāphalāni upanāmesi. Rājakumāro ayaṃ kūṭatāpaso maṃ rājakumāraṃ agaṇetvā tiracchānagatānaṃ sammānaṃ karotīti bodhisatte āghātaṃ bandhi. Tato katipāhaccayena pana sabbesupi tesu thāmabalappattesu nadiyā oghe pacchinne sappo tāpasaṃ vanditvā āha bhante tumhehi mayhaṃ mahāupakāro kato na kho panāhaṃ daliddo asukaṭṭhāne me cattāḷīsa hiraññakoṭiyo nidahitā tumhākaṃ dhanena kicce sati sabbametaṃ dhanaṃ tumhākaṃ dātuṃ sakkomi taṃ ṭhānaṃ gantvā dīghāti pakkoseyyāthāti vatvā pakkāmi. Unduropi tatheva tāpasaṃ nimantetvā atthe sati asukaṭṭhāne ṭhatvā undurāti Pakkoseyyāthāti vatvā pakkāmi. Suvapotako pana tāpasaṃ vanditvā bhante mayhaṃ dhanaṃ natthi rattasālīhi pana vo atthe sati asukaṃ nāma mayhaṃ vasanaṭṭhānaṃ tattha gantvā sukāti pakkoseyyātha ahaṃ ñātakānaṃ ārocetvā anekasakaṭapūramattā rattasālī āharāpetvā dātuṃ sakkomīti vatvā pakkāmi. Itaro pana mittadubbhidhammesu dhammatāya yaṅkiñci avatvā gantuṃ ayuttaṃeva taṃ attano santikaṃ āgataṃ māressāmīti cintetvā bhante mayi rajje patiṭṭhite āgaccheyyātha ahaṃ vo catūhi paccayehi upaṭṭhahissāmīti vatvā pakkāmi. So gantvā nacirasseva rajje patiṭṭhāsi.