Satthā jetavanapokkharaṇiyaṃ nhāyitvā rattaduppaṭṭaṃ nivāsetvā kāyabandhanaṃ bandhitvā sugatamahācīvaraṃ ekaṃsaṃ katvā bhikkhusaṅghaparivuto gantvā gandhakuṭipariveṇe paññattapavarabuddhāsane nisīditvā bhikkhusaṅghena vatte dassite uṭṭhāya maṇisopāṇaphalake ṭhatvā bhikkhusaṅghassa ovādaṃ datvā uyyojetvā surabhigandhakuṭiṃ pavisitvā dakkhiṇena passena sīhaseyyaṃ kappetvā sāyaṇhasamaye dhammasabhāyaṃ sannipatitānaṃ bhikkhūnaṃ passathāvuso dasabalassa khantimettānuddayasampattiṃ vividhesu sassesu milāyamānesu nānājalālayesu sussantesu macchakacchapesu mahādukkhaṃ pāpuṇantesu kāruññaṃ paṭicca mahājanaṃ dukkhā mocessāmīti udakasāṭakaṃ nivāsetvā jetavanapokkharaṇiyā Dhurasopāṇe ṭhatvā muhuttena sakalakosalaraṭṭhaṃ mahoghena opilāpento viya devaṃ vassāpetvā mahājanaṃ kāyikacetasikadukkhato mocetvā vihāraṃ paviṭṭhoti kathāya pavattamānāya gandhakuṭito nikkhamitvā dhammasabhaṃ āgantvā kāya nuttha bhikkhave etarahi kathāya sannisinnāti pucchitvā imāya nāmāti vutte na bhikkhave tathāgato idāneva mahājane kilamante devaṃ vassāpeti pubbepi tiracchānayoniyaṃ nibbattitvā maccharājakālepi vassāpesiyevāti vatvā atītaṃ āhari.
Atīte imasmiṃyeva kosalaraṭṭhe imissāva sāvatthiyā imasmiṃyeva jetavanapokkharaṇiṭṭhāne ekā valligahanaparikkhittā kandarā ahosi. Tadā bodhisatto macchayoniyaṃ nibbattitvā macchagaṇaparivuto tattha paṭivasati. Yathā pana idāni evameva tadāpi tasmiṃ raṭṭhe devo na vassi. Manussānaṃ sassāni milāyiṃsu. Vāpīādīsu udakaṃ chijji. Macchakacchapā kalalagahanaṃ pavisiṃsu. Imissāpi kandarāya macchā kalalagahanaṃ pavisitvā tasmiṃ tasmiṃ ṭhāne nilīyiṃsu. Kākādayo tuṇḍehi koṭṭetvā nīharitvā khādiṃsu. Bodhisatto ñātisaṅghassa taṃ byasanaṃ disvā imaṃpi etesaṃ dukkhaṃ ṭhapetvā maṃ añño koci mocetuṃ samattho nāma natthi saccakiriyaṃ katvā devaṃ vassāpetvā ñātake maraṇadukkhā mocessāmīti kāḷavaṇṇaṃ kaddamaṃ dvidhā viyūhitvā nikkhamitvā añjanarukkhasāraghaṭikavaṇṇo mahāmaccho sudhotalohitaṅkamaṇisadisāni akkhīni ummiletvā ākāsaṃ Olokento pajjunnadevarājassa saddaṃ naditvā bho pajjunna ahaṃ ñātake nissāya dukkhappatto tvaṃ mayi sīlavante kilamante kasmā devaṃ na vassāpesi mayā samānajātikānaṃ khādanaṭṭhāne nibbattitvā taṇḍulappamāṇaṃpi macchaṃ ādiṃ katvā khāditapubbo nāma natthi aññopi me pāṇo sañcicca jīvitā na voropitapubbo iminā saccena devaṃ vassāpetvā ñātisaṅghaṃ me dukkhato mocehīti vatvā paricārakaceṭakaṃ āṇāpento viya pajjunnadevarājānaṃ ālapanto imaṃ gāthamāha