Atīte bārāṇasiyaṃ brahmadatte rajjaṃ kārente bodhisatto udiccabrāhmaṇakule nibbattitvā vayappatto isipabbajjaṃ pabbajitvā abhiññā ceva samāpattiyo ca nibbattetvā himavantappadese jhānakīḷaṃ kīḷanto viharati. Tadā bārāṇasiyaṃ brahmadatto imināva niyāmena ime supine disvā brāhmaṇe pucchi. Brāhmaṇā evameva yaññaṃ yajituṃ ārabhiṃsu. Tesu purohitassa antevāsikamāṇavo paṇḍito byatto ācariyaṃ āha ācariya tumhehi mayaṃ tayo vede uggaṇhāpitā nanu tesu ekaṃ māretvā ekassa sotthikammakaraṇaṃ nāma natthīti. Tāta iminā upāyena amhākaṃ bahudhanaṃ uppajjissati tvaṃ pana rañño dhanaṃ rakkhitukāmo maññeti. Māṇavo tenahi ācariya tumhe tumhākaṃ kammaṃ karotha ahaṃ tumhākaṃ santike kiṃ karissāmīti vicaranto rañño uyyānaṃ agamāsi. Taṃ divasameva bodhisattopi taṃ kāraṇaṃ ñatvā ajja mayi manussapathaṃ gate mahājanassa bandhanā mokkho bhavissatīti ākāsenāgantvā uyyāne otaritvā suvaṇṇapaṭimā viya maṅgalasilātale nisīdi. Māṇavo Bodhisattaṃ upasaṅkamitvā vanditvā ekamantaṃ nisīditvā paṭisaṇṭhāraṃ akāsi. Bodhisattopi tena saddhiṃ madhurappaṭisaṇṭhāraṃ katvā kiṃ nu kho māṇava rājā dhammena rajjaṃ kāretīti pucchi. Bhante rājā nāma dhammiko apica kho pana naṃ brāhmaṇā atiṭṭhe pakkhandāpenti rājā soḷasa supine disvā brāhmaṇānaṃ ārocesi brāhmaṇā yaññaṃ yajissāmāti āraddhā kiṃ nu kho bhante ayaṃ nāma imesaṃ supinānaṃ nipphattīti rājānaṃ saññāpetvā tumhākaṃ mahājanaṃ bhayā mocetuṃ na vaṭṭatīti. Mayaṃ kho nāma māṇava rājānaṃ na jānāma rājāpi amhe na jānāti sace pana idhāgantvā puccheyya katheyyāmassa mayanti. Māṇavo ahaṃ bhante ānessāmi tumhe mamāgamanaṃ udikkhantā muhuttaṃ nisīdathāti bodhisattaṃ paṭijānāpetvā rañño santikaṃ gantvā mahārāja eko ākāsacārikatāpaso tumhākaṃ uyyāne otaritvā tumhehi diṭṭhasupinānaṃ nipphattiṃ kathessāmīti tumhe pakkosatīti āha. Rājā tassa kathaṃ sutvā tāvadeva mahantena parivārena uyyānaṃ gantvā tāpasaṃ vanditvā ekamantaṃ nisinno pucchi tumhe kira bhante mayā diṭṭhasupinānaṃ nipphattiṃ jānāthāti. Āma mahārājāti. Tenahi kathethāti. Kathemi mahārāja yathādiṭṭhe tāva supine maṃ sāvehīti. Sādhu bhanteti rājā