Atha satthā pātova mahāmoggallānattheraṃ āmantetvā eso moggallāna rājagahassa avidūre sakkaranigame macchariseṭṭhī kapallapūve khādissāmīti aññesaṃ dassanabhayena sattabhūmikappāsādassa Uparimatale kapallapūve pacāpesi tvaṃ tattha gantvā taṃ seṭṭhiṃ dametvā nibbisevanaṃ katvā ubhopi jāyapatike pūve ca khīrasappimadhuphāṇitāni ca gāhāpetvā attano balena jetavanaṃ ānehi ajjāhaṃ pañcahi bhikkhusatehi saddhiṃ vihāreyeva nisīdissāmi pūveheva bhattakiccaṃ karissāmīti āha. Thero sādhu bhanteti satthu vacanaṃ sampaṭicchitvā tāvadeva iddhibalena taṃ nigamaṃ gantvā tassa pāsādassa sīhapañjaradvāre sunivattho supāruto ākāseyeva maṇirūpakaṃ viya aṭṭhāsi. Mahāseṭṭhino theraṃ disvāva hadayamaṃsaṃ kampi. So ahaṃ evarūpānaññeva bhayena imaṃ ṭhānaṃ āgato ayañca āgantvā vātapānadvāre ṭhitoti gahetabbagahaṇaṃ apassanto aggimhi pakkhittaloṇasakkharā viya rosena taṭataṭāyanto evamāha samaṇa ākāse ṭhatvā tuvaṃ kiṃ labhissasi ākāse apade padaṃ dassetvā caṅkamantopi neva labhissasīti. Thero tasmiṃyeva ṭhāne aparāparaṃ caṅkami. Seṭṭhī caṅkamanto kiṃ labhissasi ākāse pallaṅkena nisīdamānopi na labhissasiyevāti āha. Thero pallaṅkaṃ ābhujitvā nisīdi. Atha naṃ nisinno kiṃ labhissasi āgantvā vātapānaummāre ṭhitopi na labhissasiyevāti āha. Thero ummāre aṭṭhāsi. Atha naṃ ummāre ṭhitopi kiṃ labhissasi dhūmāyantopi na labhissasiyevāti āha. Thero dhūmāyi. Sakalappāsādo ekadhūmo ahosi. Seṭṭhino akkhīni sūciyā vijjhanakālo viya jāto. Gehajjhāyanabhayena pajjalantopi na labhissasīti avatvā cintetvā ayaṃ samaṇo Suṭṭhu laggo aladdho na gamissati ekamassa pūvaṃ dāpessāmīti bhariyaṃ āha bhadde ekaṃ khuddakapūvaṃ pacitvā samaṇassa datvā uyyojehi nanti. Sā thokaññeva piṭṭhaṃ kapallapātiyaṃ pakkhipi. Mahāpūvo hutvā sakalapātiṃ pūretvā uddhumāto aṭṭhāsi. Seṭṭhī taṃ disvā bahuṃ tayā piṭṭhaṃ gahitaṃ bhavissatīti sayameva dabbikaṇṇena thokaṃ piṭṭhaṃ gahetvā pakkhipi. Pūvo purimapūvato mahantataro jāto. Evaṃ yaṃ yaṃ pacati so so mahantamahantova ahosi. So nibbinno bhariyaṃ āha bhadde imassa ekaṃ pūvaṃ dehīti. Tassā pacchito ekaṃ pūvaṃ gaṇhantiyā sabbe ekābaddhā allīyiṃsu. Sā seṭṭhiṃ āha sāmi sabbe pūvā ekato laggā visuṃ kātuṃ na sakkomīti. Ahaṃpi karissāmīti. So kātuṃ nāsakkhi. Ubhopi janā koṭiyaṃ gahetvā kaḍḍhantāpi viyojetuṃ nāsakkhiṃsuyeva. Athassa pūvehi saddhiṃ vāyamantasseva sarīrato sedā mucciṃsu pipāsā upacchijji. Tato bhariyaṃ āha bhadde na me pūvehi attho pacchiyā saddhiṃyeva imassa bhikkhussa dehīti. Sā pacchiṃ ādāya theraṃ upasaṅkamitvā sabbe pūve therassa adāsi.