Pitā panassa dānādīnaṃ puññānaṃ katattā devaloke sakko hutvā nibbatti. So tasmiṃ khaṇe pavattati nu kho me dānaṃ udāhu noti āvajjento tassa appavattiṃ disvā puttassa ca kulavaṃsaṃ nāsetvā dānasālāyo jhāpetvā yācake nikkaḍḍhitvā macchariyabhāve patiṭṭhāya aññesaṃ dātabbaṃ bhavissatīti bhayena gumbaṃ pavisitvā ekasseva suraṃ pivanabhāvañca disvā gacchāmi naṃ saṅkhobhetvā dametvā kammaphalasambandhaṃ jānāpetvā dānaṃ dāpetvā devaloke nibbattanārahaṃ karomīti manussapathaṃ otaritvā illīsaseṭṭhinā sadisaṃ khañjakuṇivisamacakkhumaṇḍalaṃ attabhāvaṃ nimminitvā bārāṇasīnagaraṃ pavisitvā rañño nivesanadvāre ṭhatvā attano āgamanabhāvaṃ ārocāpetvā pavisatūti vutte pavisitvā rājānaṃ vanditvā aṭṭhāsi. Rājā kiṃ mahāseṭṭhi avelāya āgatosīti Āha. Āma āgatosmi deva ghare me asītikoṭimattaṃ dhanaṃ atthi taṃ devo āharāpetvā attano bhaṇḍāgāraṃ pūrāpetūti. Alaṃ mahāseṭṭhi tava dhanato amhākaṃ gehe bahutaraṃ dhananti. Sace deva tumhākaṃ kammaṃ atthi yathāruciyā dhanaṃ gahetvā dānaṃ dammīti. Dehi mahāseṭṭhīti. So sādhu devāti rājānaṃ vanditvā nikkhamitvā illīsaseṭṭhino gehaṃ agamāsi. Sabbe upaṭṭhākamanussā parivāresuṃ. Ekopi nāyaṃ illīsoti jānituṃ samattho natthi.
So gehaṃ pavisitvā antoummāre ṭhatvā dovārikaṃ pakkosāpetvā yo añño mayā samānarūpo āgantvā mametaṃ gehanti pavisituṃ āgacchati taṃ piṭṭhiyaṃ paharitvā nīhareyyāthāti vatvā pāsādaṃ abhiruyha mahārahe āsane nisīditvā seṭṭhibhariyaṃ pakkosāpetvā seṭṭhiākāraṃ dassetvā bhadde dānaṃ demāti āha. Tassa taṃ vacanaṃ sutvāva seṭṭhibhariyā ca puttadhītaro ca dāsakammakarādayo ca ettakaṃ kālaṃ dānaṃ dātuṃ cittameva natthi ajja pana suraṃ pivitvā muducitto hutvā dātukāmo jāto bhavissatīti vadiṃsu. Atha naṃ seṭṭhibhariyā yathāruciyā detha sāmīti āha. Tenahi bherivādakaṃ pakkosāpetvā suvaṇṇarajatamaṇimuttādīhi atthikā illīsaseṭṭhissa gharaṃ gacchantūti sakalanagare bheriñcārāpehīti. So tathā akāsi. Mahājano pacchippasibbakādīni gahetvā gehadvāre sannipati. Sakko sattaratanapūre gabbhe vivarāpetvā tumhākaṃ dammi yāvadatthaṃ Gahetvā gacchathāti āha. Mahājano dhanaṃ nīharitvā mahātale rāsiṃ katvā āgatabhājanāni pūretvā gacchati.