Aññataro pana janapadamanusso illīsaseṭṭhino goṇe tasseva rathe yojetvā sattahi ratanehi pūretvā nagarā nikkhamitvā mahāmaggaṃ paṭipajjitvā tassa gumbassa avidūre rathaṃ pesento vassasataṃ jīva sāmi illīsaseṭṭhi taṃ nissāyadāni me yāvajīvaṃ kammaṃ akatvā jīvitabbaṃ jātaṃ taveva ratho taveva goṇā tava gehe satta ratanāni neva mātarā dinnāni na pitarā taṃ nissāya laddhāni sāmīti seṭṭhino guṇaṃ kathento gacchati. So taṃ saddaṃ sutvā bhītatasito cintesi ayaṃ mama nāmaṃ gahetvā idañcidañca vadati kacci nu kho raññā mama dhanaṃ lokassa dinnanti gumbā nikkhamitvā goṇe ca rathañca sañjānitvā are duṭṭhaceṭaka mayhaṃ goṇā mayhaṃ rathoti vatvā gantvā goṇe nāsārajjuyaṃ gaṇhi. Gahapatiko rathā oruyha are duṭṭhaceṭaka illīsamahāseṭṭhī sakalanagarassa dānaṃ deti tvaṃ kiṃ ahosīti pakkhanditvā asaniṃ pātento viya khandhe paharitvā rathaṃ ādāya agamāsi. So pana kampamāno uṭṭhāya paṃsuṃ puñchitvā vegena gantvā rathaṃ gaṇhi. Gahapatiko rathā otaritvā kesesu gahetvā paṇāmetvā kappurappahārehi koṭṭetvā gale gahetvā āgatamaggābhimukhaṃ khipitvā pakkāmi. Ettāvatāpissa surāmado chijji. So kampamāno vegena nivesanadvāraṃ gantvā dhanaṃ ādāya gacchante mahājane disvā ambho kiṃ nāmetaṃ kiṃ rājā mama Dhanaṃ vilumpāpetīti taṃ taṃ gantvā gaṇhāti. Gahitagahitā paharitvā pādamūleyeva pātenti. So vedanāppatto gehaṃ pavisituṃ ārabhi. Dvārapālā are duṭṭhagahapati kuhiṃ pavisasīti veḷupesikāhi pothetvā gīvāyaṃ gahetvā nīhariṃsu. So ṭhapetvā idāni rājānaṃ natthi me añño koci paṭisaraṇanti rañño santikaṃ gantvā deva mama gehaṃ tumhe vilumpāpethāti āha. Nāhaṃ seṭṭhi vilumpāpemi nanu tvameva āgantvā sace tumhe na gaṇhatha ahaṃ mama dhanaṃ dānaṃ dassāmīti nagare bheriñcārāpetvā dānaṃ adāsīti. Nāhaṃ deva tumhākaṃ santikaṃ āgacchāmi kiṃ tumhe mayhaṃ macchariyabhāvaṃ na jānātha ahaṃ tiṇaggena telabinduṃpi kassaci na demi yo so dānaṃ deti taṃ pakkosāpetvā vīmaṃsatha devāti.