Tena kho pana samayena kāsīraṭṭhe ekasmiṃ araññe bahunnaṃ manussānaṃ sañcaraṇamaggaṃ byaggho chaḍḍāpeti bahū manusse gahetvā gahetvā khādati. Taṃ pavuttiṃ rañño ārocesuṃ. Rājā bhīmasenaṃ pakkosāpetvā sakkhissasi tāta etaṃ byagghaṃ gaṇhitunti āha. Deva kiṃ dhanuggaho nāmāhaṃ yadi byagghaṃ gahetuṃ na sakkomīti. Rājā tassa paribbayaṃ datvā uyyojesi. So gharaṃ gantvā bodhisattassa kathesi. Bodhisatto sādhu samma gacchāti āha. Tvaṃ pana na gamissasīti. Ahaṃ na gamissāmi upāyaṃ pana te ācikkhissāmīti. Ācikkha sammāti. Tvaṃ byagghassa vasanaṭṭhānaṃ sahasā ekakova mā agamāsi jānapadamanusse pana sannipātetvā ekaṃ vā dve vā dhanusahassāni gāhāpetvā tattha gantvā byagghassa uṭṭhitabhāvaṃ ñatvā palāyitvā ekaṃ gumbaṃ pavisitvā urena nipajjeyyāsi jānapadā ca byagghaṃ pothetvā Gaṇhissanti tehi byagghe gahite tvaṃ dantehi ekaṃ valliṃ chinditvā koṭiyaṃ gahetvā tattha gantvā matabyagghassa santikaṃ gantvā bhonto kenesa byaggho mārito ahaṃ imaṃ byagghaṃ goṇaṃ viya valliyā bandhitvā rañño santikaṃ nessāmīti valliatthāya gumbaṃ paviṭṭho mayā valliyā anābhatāyaeva kenesa byaggho māritoti katheyyāsi atha te jānapadā bhītatasitā sāmi mā rañño ācikkhāti bahuṃ dhanaṃ dassanti byaggho tayāva gahito bhavissati raññopi santikā bahuṃ dhanaṃ labhissasīti. So sādhūti gantvā bodhisattena kathitaniyāmeneva byagghaṃ gahetvā araññaṃ khemaṃ katvā mahājanaparivuto bārāṇasiṃ āgantvā rājānaṃ disvā gahito me deva byaggho araññaṃ khemaṃ katanti āha. Rājā tuṭṭho bahuṃ dhanaṃ adāsi.
Punekadivasaṃ ekaṃ maggaṃ mahiso chaḍḍāpetīti ārocayiṃsu. Rājā tatheva bhīmasenaṃ pesesi. Sopi bodhisattena dinnanayena byagghaṃ viya tampi gahetvā āgacchi. Rājā puna bahuṃ dhanaṃ adāsi. Mahantaṃ issariyaṃ jātaṃ. So issariyamadamatto bodhisatte avamaññaṃ katvā tassa vacanaṃ na gaṇhati nāhaṃ taṃ nissāya jīvāmi kiṃ tvaññeva purisoti ādīni pharusavacanāni vadati. Atha katipāhaccayeneva eko sāmantarājā āgantvā bārāṇasiṃ uparundhitvā rajjaṃ vā me detu yuddhaṃ vāti rañño sāsanaṃ pesesi. Rājā yujjhāhīti bhīmasenaṃ peseti. So sabbasannāhasannaddho rājavesaṃ gahetvā susannaddhassa vāraṇassa piṭṭhe nisīdi. Bodhisattopi tassa maraṇabhayena sabbasannāhasannaddho bhīmasenasseva pacchimāsane nisīdi. Vāraṇo mahājanaparivuto nagaradvārena nikkhamitvā saṅgāmasīsaṃ pāpuṇi. Bhīmaseno yuddhabherisaddaṃ sutvāva kampituṃ āraddho. Bodhisatto idānesa hatthipiṭṭhito patitvā marissatīti hatthito apatanatthaṃ bhīmasenaṃ yottena parikkhipitvā gaṇhi. Bhīmaseno sampahāraṭṭhānaṃ disvā maraṇabhayatajjito sarīravalañjena hatthipiṭṭhiṃ dūseti. Bodhisatto na kho te bhīmasena purimena pacchimaṃ sameti tvaṃ pubbe saṅgāmayodho viya ahosi idāni hatthipiṭṭhiṃ dūsesīti vatvā imaṃ gāthamāha