Tattha yante pavikatthitaṃ pureti yaṃ tayā pubbe kiṃ tvaṃyeva puriso nāhaṃ puriso ahampi saṅgāmayodhoti pavikatthitaṃ vambhanavacanaṃ vuttaṃ idantāva ekaṃ. Atha te pūtisarā sajanti pacchāti atha te ime pūtibhāvena ca saraṇabhāvena ca pūtisarāti laddhanāmā sarīravalañjadhārā sajanti valañjanti paggharanti. Pacchāti tato pure pavikatthitato aparabhāge idāni imasmiṃ saṅgāmasīseti attho. Ubhayaṃ na sameti bhīmasenāti idaṃ bhīmasena ubhayaṃ na sameti. Kataraṃ. Yuddhakathā ca idañca te vihaññanti yā ca pure kathitā Yuddhakathā yañca te idāni vihaññaṃ kilamatho hatthipiṭṭhidūsanākārappatto vighātoti attho.

Evaṃ bodhisatto taṃ garahitvā mā bhāyi samma kasmā mayi ṭhite vihaññasīti bhīmasenaṃ piṭṭhito otāretvā nhāyitvā gehameva gacchāti uyyojetvā ajja mayā pākaṭena bhavituṃ vaṭṭatīti saṅgāmasīsaṃ pavisitvā sīhanādaṃ unnaditvā balakoṭṭhakaṃ bhinditvā sapattarājānaṃ jīvaggāhaṃ gāhāpetvā bārāṇasīrañño santikaṃ agamāsi. Rājā tuṭṭho bodhisattassa mahantaṃ yasaṃ adāsi. Tato paṭṭhāya cūḷadhanuggahapaṇḍitoti sakalajambūdīpe pākaṭo ahosi. So bhīmasenassa paribbayaṃ datvā sakaṭṭhānameva pesetvā dānādīni puññāni katvā yathākammaṃ gato.

Satthā na bhikkhave idānevesa bhikkhu vikattheti pubbe vikatthesiyevāti vatvā imaṃ dhammadesanaṃ āharitvā anusandhiṃ ghaṭetvā jātakaṃ samodhānesi tadā bhīmaseno vikatthitabhikkhu ahosi cūḷadhanuggahapaṇḍito pana ahamevāti.

Bhīmasenajātakaṃ dasamaṃ.