Tattha ārogyamicche paramañca lābhanti cakāro nipātamattaṃ. Tāta paṭhamameva ārogyasaṅkhātaṃ paramaṃ lābhaṃ iccheyyāti imamatthaṃ dīpento evamāha. Tattha ārogyaṃ nāma sarīrassa ca cittassa ca arogabhāvo anāturatā. Sarīre hi rogāture neva aladdhaṃ bhogalābhaṃ uppādetuṃ sakkoti na laddhaṃ paribhuñjituṃ anāturo pana ubhayampetaṃ sakkotīti citte ca upakkilesāture neva aladdhaṃ jhānādilābhaṃ uppādetuṃ sakkoti na laddhaṃ puna samāpattivasena paribhuñjituṃ etasmiṃ roge sati aladdhopi lābho na labbhati laddhopi niratthako hoti asati panetasmiṃ aladdhopi lābho labbhati laddhopi sātthiko hotīti ārogyaṃ paramo lābho nāma taṃ sabbappaṭhamaṃ icchitabbaṃ idamekamatthassa dvāranti ayamettha attho. Sīlañcāti ācārasīlaṃ. Iminā lokacārittaṃ dasseti. Buddhānumatanti guṇavuḍḍhānaṃ paṇḍitānaṃ anumataṃ. Iminā ñāṇasampannānaṃ garūnaṃ ovādaṃ dasseti. Sutañcāti kāraṇanissitaṃ sutaṃ. Iminā imasmiṃ loke attanissitaṃ bāhusaccaṃ dasseti. Dhammānuvattī Cāti tividhassa sucaritadhammassa anuvattanaṃ. Iminā duccaritadhamme vajjetvā sucaritadhammānuvattanabhāvaṃ dasseti. Alīnatā cāti cittassa alīnatā anīcatā. Iminā cittassa asaṅkocappaṇītabhāvauttamabhāvaṃ dasseti. Atthassa dvārā pamukhā chaḷeteti attho nāma vuḍḍhisaṅkhātassa lokiyalokuttarassa atthassa ete pamukhā uttamā cha dvārā upāyā adhigamanamukhāti.

Evaṃ bodhisatto puttassa atthassa dvārapañhaṃ kathesi. So tato paṭṭhāya tesu chasu dhammesu pavattati. Bodhisatto dānādīni puññāni katvā yathākammaṃ gato.

Satthā imaṃ dhammadesanaṃ āharitvā jātakaṃ samodhānesi tadā putto paccuppannaputto mahāseṭṭhī pana ahamevāti.

Atthassadvārajātakaṃ catutthaṃ.