So satthu santikaṃ gantvā pabbajjaṃ yācitvā pabbajjañca upasampadañca labhitvā avissaṭṭhakammaṭṭhāno vipassanaṃ vaḍḍhetvā arahattaṃ patvā satthāraṃ upasaṅkamitvā bhante mayhaṃ pabbajjā matthakaṃ pattāti aññaṃ byākāsi. Tassa taṃ aññabyākaraṇaṃ bhikkhusaṅghe pākaṭaṃ jātaṃ. Athekadivasaṃ dhammasabhāyaṃ sannipatitvā bhikkhū āvuso asuko nāma rañño upaṭṭhāko brāhmaṇo attano sīlaṃ vīmaṃsitvā rājānaṃ āpucchitvā pabbajitvā arahatte patiṭṭhitoti tassa guṇaṃ kathayamānā nisīdiṃsu. Satthā āgantvā kāya nuttha bhikkhave etarahi kathāya sannisinnāti pucchitvā imāya nāmāti vutte na bhikkhave idāneva ayameva brāhmaṇo attano Sīlaṃ vīmaṃsitvā pabbajitvā attano patiṭṭhaṃ akāsi pubbepi paṇḍitā attano sīlaṃ vīmaṃsitvā pabbajitvā attano patiṭṭhaṃ kariṃsūti vatvā tehi yācito atītaṃ āhari.
Atīte bārāṇasiyaṃ brahmadatte rajjaṃ kārente bodhisatto tassa purohito ahosi dānādhimutto sīlajjhāsayo akhaṇḍapañcasīlo. Rājā sesabrāhmaṇehi atirekataraṃ tassa sammānaṃ karotīti sabbaṃ purimasadisameva. Bodhisatte pana bandhitvā rañño santikaṃ nīyamāne ahiguṇḍikā antaravīthiyaṃ sappaṃ kīḷāpentā naṃ naṅguṭṭhe gaṇhanti gīvāya gaṇhanti gale veṭhenti. Bodhisatto te disvā mā tātā etaṃ sappaṃ naṅguṭṭhe gaṇhatha mā gīvāyaṃ gaṇhatha mā gale veṭhetha ayañhi te ḍaṃsitvāva jīvitakkhayaṃ pāpeyyāti āha. Ahiguṇḍikā ayaṃ brāhmaṇa sappo sīlavā ācārasampanno tādiso dussīlo na hoti tvaṃ pana attano dussīlatāya anācāro rājakuṭumba- vilumpakacoroti bandhitvā niyyāsīti āhaṃsu. So cintesi sappāpi tāva aḍaṃsantā aviheṭhentā sīlavantoti nāmaṃ labhanti kimaṅgaṃ pana manussabhūtā sīlameva imasmiṃ loke uttamaṃ nāma natthi tato uttaritaranti. Atha naṃ netvā rañño dassesuṃ. Rājā kiṃ idaṃ tātāti pucchi. Rājakuṭumbavilumpakacoro devāti. Tenahissa rājāṇaṃ karothāti. Brāhmaṇo nāhaṃ mahārāja coroti āha. Atha kasmā kahāpaṇe aggahesīti ca vutte purimanayeneva sabbaṃ Ārocento svāhaṃ iminā kāraṇena imasmiṃ loke sīlameva uttamaṃ sīlaṃ pāmokkhanti sanniṭṭhānaṃ gatoti vatvā tiṭṭhatu tāva idaṃ āsīvisopi tāva aḍaṃsanto aviheṭhento sīlavāti vattabbataṃ labhati imināpi kāraṇena sīlameva uttamaṃ sīlaṃ pavaranti sīlaṃ vaṇṇento imaṃ gāthamāha