sīlaṃ kireva kalyāṇaṃ sīlaṃ loke anuttaraṃ

passa ghoraviso nāgo sīlavāti na haññatīti.

Tattha sīlaṃ kirevāti kāyavācācittehi avītikkamanasaṅkhātaṃ ācārasīlameva. Kireti anussavavasena vadati. Kalyāṇanti sundaraṃ pavaraṃ. Anuttaranti jeṭṭhakaṃ sabbaguṇadāyakaṃ. Passāti attanā diṭṭhakāraṇaṃ abhimukhaṃ karonto kathesi. Sīlavāti na haññatīti ghoravisopi samāno aḍaṃsanaaviheṭhanamattakena sīlavāti pasaṃsaṃ labhati na haññati na vihaññatīti imināpi kāraṇena sīlameva uttamanti.

Evaṃ bodhisatto imāya gāthāya rañño dhammaṃ desetvā kāme pahāya isipabbajjaṃ pabbajitvā himavantaṃ pavisitvā pañcābhiññā ca aṭṭha samāpattiyo ca nibbattetvā brahmalokaparāyano ahosi.