Tattha kalyāṇameva muñceyyāti catuddosavinimuttaṃ kalyāṇaṃ sundaraṃ anavajjameva muñceyya vissajjeyya katheyya. Na hi muñceyya pāpikanti pāpikaṃ lāmakaṃ paresaṃ appiyaṃ amanāpaṃ na muñceyya. Mokkho kalyāṇiyā sādhūti kalyāṇavācāya vissajjanameva imasmiṃ loke sādhu sundaraṃ bhaddakaṃ. Mutvā tapati pāpikanti pāpikaṃ pharusavācaṃ muñcitvā vissajjetvā kathetvā so puggalo tapati socati kilamatīti.

Evaṃ satthā imaṃ dhammadesanaṃ āharitvā jātakaṃ samodhānesi tadā brāhmaṇo ānando ahosi brāhmaṇī uppalavaṇṇā sārambho pana ahamevāti.

Sārambhajātakaṃ aṭṭhamaṃ.