Dhammasabhāyaṃ sannisinnā bhikkhū therassa guṇaṃ vaṇṇayiṃsu āvuso ānandatthero attano bahussutatāya paṇḍiccena upāyakusalatāya ca mahājanaṃ akilametvā upāyeneva rañño maṇiṃ dassesīti. Satthā āgantvā kāya nuttha bhikkhave etarahi kathāya sannisinnāti pucchitvā imāya nāmāti vutte na bhikkhave idāneva ānandeneva parahatthagataṃ bhaṇḍaṃ dassitaṃ pubbepi paṇḍitā mahājanaṃ akilametvāva upāyeneva tiracchānahatthagataṃ bhaṇḍaṃ dassayiṃsūti vatvā tehi yācito atītaṃ āhari.
Atīte bārāṇasiyaṃ brahmadatte rajjaṃ kārente bodhisatto sabbasippānaṃ nipphattiṃ patto tasseva amacco ahosi. Athekadivasaṃ rājā mahantena parivārena uyyānaṃ gantvā vanantarāni vicaritvā udakakīḷaṃ kīḷitukāmo maṅgalapokkharaṇiṃ otaritvā itthāgārampi pakkosi. Itthiyo attano sīsūpagagīvūpagādīni ābharaṇāni omuñcitvā uttarāsaṅge pakkhipitvā samuggapiṭṭhesu ṭhapetvā dāsiyo paṭicchāpetvā pokkharaṇiṃ otariṃsu. Athekā uyyānamakkaṭī sākhantare nisinnā deviṃ pilandhanāni omuñcitvā uttarāsaṅge pakkhipitvā samuggapiṭṭhesu ṭhapiyamānaṃ disvā tassā muttāhāraṃ pilandhitukāmā hutvā dāsiyā pamādaṃ olokayamānā nisīdi. Dāsīpi rakkhamānā tahiṃ tahiṃ oloketvā nisinnāyeva niddāyituṃ ārabhi. Makkaṭī tassā pamādabhāvaṃ ñatvā vātavegena otaritvā mahāmuttāhāraṃ gīvāyaṃ paṭimuñcitvā vātavegeneva uppatitvā sākhantare nisīditvā aññāsaṃ makkaṭīnaṃ dassanabhayena ekasmiṃ rukkhasusiraṭṭhāne ṭhapetvā upasantupasantā viya taṃ rakkhamānā nisīdi. Sāpi kho dāsī pabujjhitvā muttāhāraṃ apassantī kampamānā aññaṃ upāyaṃ adisvā Puriso deviyā mttāhāraṃ gahetvā palātoti mahāviravaṃ viravi. Ārakkhamanussā tato tato sannipatitvā tassā vacanaṃ sutvā rañño ārocesuṃ. Rājā coraṃ gaṇhathāti āha. Purisā uyyānā nikkhamitvā coraṃ gaṇhatha gaṇhathāti ito cito ca olokenti.
Atheko jānapado balikārakapuriso taṃ saddaṃ sutvā kampamāno palāyi. Taṃ disvā rājapurisā ayaṃ coro bhavissatīti anubandhiṃsu taṃ gahetvā pothetvā are duṭṭhacora evaṃ mahāsāraṃ nāma pilandhanaṃ harasīti paribhāsiṃsu. So cintesi sacāhaṃ na gaṇhāmīti vakkhāmi ajja me jīvitaṃ natthi pothentāyeva maṃ māressanti sampaṭicchāmi nanti. So āma sāmi gahitaṃ meti āha. Atha naṃ bandhitvā rañño santikaṃ ānayiṃsu. Rājāpi naṃ pucchi gahitaṃ te mahāsārapilandhananti. Āma devāti. Idāni naṃ kahanti. Deva mayā mahāsāraṃ nāma mañcapīṭhampi na diṭṭhapubbaṃ seṭṭhī pana maṃ mahāsāraṃ pilandhanaṃ gaṇhāpesi sohaṃ gahetvāva tassa adāsi sopi naṃ jānātīti. Rājā seṭṭhiṃ pakkosāpetvā gahitaṃ te imassa hatthato mahāsārapilandhananti pucchi. Āma devāti. Kahaṃ tanti. Purohitassa me dinnanti. Purohitampi pakkosāpetvā tatheva pucchi. Sopi sampaṭicchitvā gandhabbassa me dinnanti āha. Tampi pakkosāpetvā purohitassa te hatthato mahāsārapilandhanaṃ gahitanti pucchi. Āma devāti. Kahaṃ tanti. Kilesavasena me vaṇṇadāsiyā dinnanti. Tampi pakkosāpetvā Pucchi. Sā na gaṇhāmīti āha. Te pañca jane pucchantānaññeva suriyo aṭṭhaṅgato. Rājā idāni vikālo jāto sve jānissāmīti te pañca jane amaccānaṃ datvā nagaraṃ pāvisi.