Bodhisatto cintesi idaṃ pilandhanaṃ antovalañje naṭṭhaṃ ayañca gahapatiko bahivalañjo dvārepi balavārakkho tasmā antovalañjanakānampi taṃ gahetvā palāyituṃ na sakkā evaṃ neva bahivalañjanakānaṃ na antouyyāne valañjanakānaṃ gahaṇupāyo dissati iminā duggatamanussena seṭṭhissa me dinnanti kathentena attano mokkhatthāya kathitaṃ bhavissati seṭṭhināpi purohitassa me dinnanti kathentena ekato hutvā nittharissāmāti cintetvā kathitaṃ bhavissati purohitenāpi gandhabbassa me dinnanti kathentena bandhanāgāre gandhabbaṃ nissāya sukhena vasissāmāti cintetvā kathitaṃ bhavissati gandhabbenāpi vaṇṇadāsiyā me dinnanti kathentena anukkaṇṭhitā vasissāmāti cintetvā kathitaṃ bhavissati imehi pañcahipi acorehi bhavitabbaṃ uyyāne makkaṭā bahū pilandhanena ekissā makkaṭiyā hatthe āruḷhena bhavitabbanti. So rājānaṃ upasaṅkamitvā mahārāja te core amhākaṃ niyyādetha mayaṃ taṃ kiccaṃ sodhessāmāti āha. Rājā sādhu paṇḍita sodhehīti tassa niyyādesi. Bodhisatto attano dāsapurise pakkosāpetvā te pañcapi jane ekasmiṃyeva ṭhāne vasāpetvā samantā ārakkhaṃ katvā kaṇṇaṃ datvā yaṃ te aññamaññaṃ kathenti taṃ mayhaṃ ārocethāti vatvā pakkāmi. Te tathā akaṃsu.

Tato manussānaṃ sannisinnavelāya seṭṭhī taṃ gahapatikaṃ are duṭṭhagahapatika tayā ahaṃ mayā vā tvaṃ kahaṃ diṭṭhapubbo kadā te mayhaṃ pilandhanaṃ dinnanti āha. Sāmi mahāseṭṭhi ahaṃ mahāsāraṃ nāma rukkhasārapādakaṃ mañcapīṭhakaṃpi na jānāmi taṃ nissāya pana mokkhaṃ labhissāmīti evaṃ avacaṃ mā me kujjha sāmīti. Purohitopi seṭṭhiṃ āha mahāseṭṭhi tvaṃ iminā pilandhanaṃ attano adinnakameva mayhaṃ kathaṃ adāsīti. Mayaṃ dvepi issarā amhākaṃ ekato hutvā kathitakāle kammaṃ khippaṃ nippajjissatīti kathemīti. Gandhabbopi purohitaṃ āha brāhmaṇa kadā tayā mayhaṃ pilandhanaṃ dinnanti. Ahaṃ taṃ nissāya vasanaṭṭhāne sukhaṃ vasissāmīti kathesinti. Vaṇṇadāsīpi gandhabbaṃ āha are duṭṭhagandhabba ahaṃ kadā tava santikaṃ gatapubbā tvaṃ vā mama santikaṃ āgatapubbo kadā te mayhaṃ pilandhanaṃ dinnanti. Bhagini kiṃkāraṇā kujjhasi amhesu pañcasu ekato vasantesu gharāvāso bhavissati anukkaṇṭhamānā sukhaṃ vasissāmāti kathesinti.