Atīte ekanavutikappamatthake bodhisatto bāhirakatapaṃ vīmaṃsissāmīti ājīvakapabbajjaṃ pabbajitvā acelako ahosi rajojalliko pavivitto ahosi ekavihārī manusse disvā migo viya palāyi mahāvikatibhojano ahosi vacchagomayādīni paribhuñjitvā appamādavihāratthāya araññe ekasmiṃ bhiṃsanake vanasaṇḍe vihāsi tasmiṃ viharanto Himapātasamaye antaraṭṭhake rattiṃ vanasaṇḍā nikkhamitvā abbhokāse viharitvā suriye uggate vanasaṇḍaṃ pavisati. So yathā rattiṃ abbhokāse himodakena tinto tatheva divā vanasaṇḍato paggharantehi udakavindūhi temiyati evaṃ ahorattaṃ sītadukkhaṃ anubhoti gimhānaṃ pana pacchime māse divā abbhokāse viharitvā rattiṃ vanasaṇḍaṃ pavisati. So yathā divā abbhokāse ātapena pariḷāhaṃ patto tatheva rattiṃ nivāte vanasaṇḍe pariḷāhaṃ pāpuṇāti. Sarīrā sedadhārā muccanti. Athassa pubbe assutapubbā ayaṃ gāthā paṭibhāsi
sotatto sosīto gato eko bhiṃsanake vane
naggo na caggimāsīno esanāpasuto munīti.
Tattha sotattoti suriyasantāpena sutatto. Sosītoti himodakena susīto suṭṭhu tinto. Eko bhiṃsanake vaneti yattha paviṭṭhānaṃ yebhuyyena lomāni haṃsanti tathārūpe bhiṃsanake vanasaṇḍe eko adutiyova ahosinti dīpeti. Naggo na caggimāsīnoti naggo na ca aggimāsīno vātasītena pīḷiyamānopi neva nivāsanapārupanādīni na aggiṃ āgamma nisīdinti dīpeti. Esanāpasutoti abrahmacariyepi tasmiṃ brahmacariyasaññī hutvā brahmacariyañcevetaṃ esanā ca gavesanā ca upāyo brahmalokassāti evaṃ tāya brahmacariyesanāya pasuto anuyutto ussukkaṃ āpanno ahosinti dasseti. Munīti muni kho esa monatthāya paṭipannoti evaṃ Lokena sambhāvito ahosinti dīpeti.