Iti bhagavā kāyagatāsatiṃ bhāvetukāmena bhikkhunā telapattahatthena tena purisena viya satiṃ avissajjetvā appamattena kāyagatāsati bhāvetabbāti imaṃ suttaṃ āharitvā dasseti. Bhikkhū imaṃ suttañca atthañca sutvā evamāhaṃsu dukkaraṃ bhante tena purisena kataṃ tathārūpaṃ janapadakalyāṇiṃ anoloketvā telapattaṃ ādāya gacchantenāti. Satthā na bhikkhave tena dukkaraṃ kataṃ sukaramevetaṃ kasmā ukkhittāsikena purisena santajjetvā nīyamānatāya yampana pubbe paṇḍitā appamādena satiṃ avissajjetvā abhisaṅkhataṃ dibbarūpampi indriyāni bhinditvā anoloketvāva gantvā rajjaṃ pāpuṇiṃsu etaṃ dukkaranti vatvā tehi yācito atītaṃ āhari.
Atīte bārāṇasiyaṃ brahmadatte rajjaṃ kārente bodhisatto tassa rañño puttasatassa sabbakaniṭṭho hutvā nibbattitvā anupubbena viññutaṃ pāpuṇi. Tadā ca rañño gehe paccekabuddhā bhuñjanti. Bodhisatto tesaṃ veyyāvaccaṃ karoti. So ekadivasaṃ cintesi mama bahū bhātaro lacchāmi nu kho ahaṃ imasmiṃ nagare kulasantakaṃ rajjaṃ udāhu noti. Athassa etadahosi Paccekabuddhe pucchitvā jānissāmīti. So dutiyadivase paccekabuddhesu āgatesu dhammakarakaṃ ādāya pānīyaṃ parissāvetvā pāde dhovitvā telena makkhetvā tesaṃ antare khajjakaṃ khāditvā nisinnakāle vanditvā ekamantaṃ nisinno tamatthaṃ pucchi. Atha naṃ te avocuṃ kumāra na tvaṃ imasmiṃ nagare rajjaṃ labhissasi ito pana vīsatiyojanasatamatthake gandhāraraṭṭhe takkasilānagaraṃ nāma atthi tattha gantuṃ sakkonto ito sattame divase rajjaṃ lacchasi antarāmagge pana mahāvattaniaṭviyaṃ paripantho atthi taṃ aṭviṃ pariharitvā gacchantassa vīsatiyojanasatiko maggo hoti ujuṃ gacchantassa paññāsa yojanāni honti so hi amanussakantāro nāma tattha yakkhiniyo antarāmagge gāme ca sālāyo ca māpetvā uparisuvaṇṇatārakavicittavitānaṃ mahārahaṃ sayanaṃ paññāpetvā nānāvirāgapaṭṭasāṇiyo parikkhipitvā dibbālaṅkārehi attabhāvaṃ maṇḍetvā sālāsu nisīditvā gacchante purise madhurāhi vācāhi saṅgaṇhitvā kilantarūpā viya paññāyatha idhāgantvā nisīditvā pānīyaṃ pivitvā gacchathāti pakkositvā āgatānaṃ āsanāni datvā attano rūpalīḷhāvilāsehi palobhetvā kilesavasike katvā attanā saddhiṃ ajjhācāre kate tattheva ne lohitena paggharantena khāditvā jīvitakkhayaṃ pāpenti rūpagocaraṃ sattaṃ rūpeneva gaṇhanti saddagocaraṃ sattaṃ madhurena gītavāditasaddena gandhagocaraṃ sattaṃ dibbagandhehi rasagocaraṃ sattaṃ dibbena nānaggarasabhojanena phoṭṭhabbagocaraṃ sattaṃ ubhatolohitakūpadhānehi Dibbasayanehi sace pañca indriyāni bhinditvā tā anoloketvā satiṃ paccupaṭṭhapetvā gamissasi sattame divase tattha rajjaṃ lacchasīti. Bodhisatto hotu bhante tumhākaṃ ovādaṃ gahetvā kiṃ etā olokessāmīti paccekabuddhehi parittaṃ kārāpetvā parittavālikañceva parittasuttañca ādāya paccekabuddhe ca mātāpitaro ca vanditvā nivesanaṃ gantvā attano purise āha ahaṃ takkasilāyaṃ rajjaṃ gahetuṃ gacchāmi tumhe idheva tiṭṭhathāti. Atha naṃ pañca janā āhaṃsu mayampi anugacchāmāti. Na sakkā tumhehi anugantuṃ antarāmagge kira yakkhiniyo rūpādigocare manusse evañcevañca rūpādīhi palobhetvā gaṇhanti mahā paripantho ahampana attānaṃ takketvā gacchāmīti. Kiṃ pana te deva mayaṃ tumhehi saddhiṃ gacchantā attano piyāni rūpādīni olokessāma mayampi tattheva gamissāmāti. Bodhisatto tenahi appamattā hothāti te pañca jane ādāya paṭipajji.