Yakkhiniyo gāmādīni māpetvā nisīdiṃsu. Tesu rūpagocaro puriso tā yakkhiniyo oloketvā rūpārammaṇe paṭibaddhacitto thokaṃ ohīyi. Bodhisatto kiṃ bho thokaṃ ohīyasīti āha. Deva pādā me rujjhanti thokaṃ sālāyaṃ nisīditvā āgamissāmīti. Ambho etā yakkhiniyo mā kho paṭṭhesīti. Yaṃ hoti taṃ hotu na sakkomi devāti. Tenahi paññāyissasīti. Itare cattāro Ādāya agamāsi. So rūpagocarako tāsaṃ santikaṃ agamāsi. Tā attanā saddhiṃ ajjhācāre kate taṃ tattheva jīvitakkhayaṃ pāpetvā purato gantvā aññaṃ sālaṃ māpetvā nānāturiyāni gahetvā gāyamānā nisīdiṃsu. Tattha saddagocarako ohīyi. Tampi khāditvā purato gantvā nānappakāre gandhakaraṇḍake pūretvā āpaṇaṃ pasāretvā nisīdiṃsu. Tattha gandhagocarako ohīyi. Tampi khāditvā purato gantvā nānaggarasānaṃ dibbabhojanānaṃ bhājanāni pūretvā odanaāpaṇaṃ pasāretvā nisīdiṃsu. Tattha rasagocarako ohīyi. Tampi khāditvā purato gantvā dibbasayanāni paññāpetvā nisīdiṃsu. Tattha phoṭṭhabbagocarako ohīyi. Tampi khādiṃsu.

Bodhisatto ekakova ahosi. Athekā yakkhinī atikharamanto vatāyaṃ ahaṃ taṃ khāditvāva nivattissāmīti bodhisattassa pacchato pacchato agamāsi. Aṭaviyā parabhāge vanakammikādayo yakkhiniṃ disvā ayante purato gacchanto puriso kiṃ hotīti pucchiṃsu. Komārasāmiyo me ayyāti. Ambho ayaṃ evaṃ sukhumālā pupphadāmasadisā suvaṇṇavaṇṇā kumārikā attano kulaṃ chaḍḍetvā bhavantaṃ takketvā nikkhantā kasmā etaṃ kilametvā ādāya na gacchasīti. Nesā ayyā mayhaṃ pajāpati yakkhinī esā etāya me pañca manussā khāditāti. Ayyā purisā nāma kuddhakāle attano pajāpatiyo yakkhiniyopi karonti petiyopīti. Yakkhinī āgacchamānā gabbhinīvaṇṇaṃ dassetvā puna sakiṃ vijātavaṇṇaṃ katvā Puttaṃ aṅkenādāya bodhisattaṃ anubandhi. Diṭṭhadiṭṭhā purimanayeneva pucchanti. Bodhisattopi tatheva vatvā gacchanto takkasilaṃ pāpuṇi. Sā puttaṃ antaradhāpetvā ekikāva anubandhi. Bodhisatto nagaraṃ gantvā ekissā sālāya nisīdi. Sāpi kho yakkhinī bodhisattassa tejena pavisituṃ asakkontī dibbarūpaṃ māpetvā sālādvāre aṭṭhāsi.