Tasmiṃ samaye takkasilato rājā uyyānaṃ gacchanto taṃ disvā paṭibaddhacitto hutvā gaccha puccha imissā sassāmikabhāvaṃ vā assāmikabhāvaṃ vā jānāhīti manussaṃ pesesi. So taṃ upasaṅkamitvā sassāmikāsīti pucchi. Āma ayya ayaṃ me sālāyaṃ nisinno sāmikoti. Bodhisatto nesā mayhaṃ pajāpati yakkhinī esā etāya me pañca manussā khāditāti āha. Sāpi purisā nāma ayya kuddhakāle yaṃ icchanti taṃ vadantīti āha. So ubhinnampi vacanaṃ rañño ārocesi. Rājā assāmikabhaṇḍaṃ nāma rājasantakaṃ hotīti yakkhiniṃ pakkosāpetvā ekahatthipiṭṭhe nisīdāpetvā nagaraṃ padakkhiṇaṃ katvā pāsādaṃ abhiruyha taṃ aggamahesiṭṭhāne ṭhapesi. So nhātānuvilitto sāyamāsaṃ bhuñjitvā sirisayanaṃ abhiruhi. Sāpi yakkhinī attano upakappanakaṃ āhāraṃ āharitvā alaṅkatappaṭiyattā sirisayane raññā saddhiṃ nipajjitvā rañño rativasena sukhasamappitassa nipannakāle ekena passena parivattitvā parodi. Atha naṃ rājā bhadde kiṃ rodasīti pucchi. Deva ahaṃ tumhehi Magge disvā ānītā tumhākañca gehe bahū itthiyo sāhaṃ sapatīnaṃ antare vasamānā kathāya uppannāya ko tuyhaṃ mātaraṃ vā pitaraṃ vā gottaṃ vā jātiṃ vā jānāti tvaṃ antarāmagge disvā ānītā nāmāti sīse gahetvā nippīḷiyamānā viya maṅku bhavissāmi sace tumhe sakalaraṭṭhe issariyañca āṇañca mayhaṃ dadeyyātha koci mayhaṃ cittaṃ kopetvā kathetuṃ na sakkhissatīti. Bhadde mayhaṃ sakalaraṭṭhavāsino na kiñci honti nāhaṃ etesaṃ sāmiko ye pana rājānaṃ kopetvā akattabbaṃ karonti tesaññevāhaṃ sāmiko iminā kāraṇena na sakkā tuyhaṃ sakalaraṭṭhe issariyañca āṇañca dātunti. Tenahi deva sace raṭṭhe vā nagare vā āṇaṃ dātuṃ na sakkosi antonivesane antovalañjanakānaṃ upari mama vase vattanatthāya āṇaṃ dethāti āha. Rājā dibbaphoṭṭhabbena baddho tassā vacanaṃ atikkamituṃ asakkonto sādhu bhadde antovalañjanakesu tuyhaṃ āṇaṃ dammi tvaṃ ete attano vase vattāpehīti āha. Sā sādhūti sampaṭicchitvā rañño niddaṃ okkantakāle yakkhanagaraṃ gantvā yakkhe pakkositvā attano rājānaṃ jīvitakkhayaṃ pāpetvā aṭṭhimattaṃ sesetvā sabbaṃ nahārucammamaṃsalohitaṃ khādi. Avasesayakkhā mahādvārato paṭṭhāya antonivesane kukkuṭkukkure ādiṃ katvā sabbe khāditvā aṭṭhī sese akaṃsu. Punadivase dvāraṃ yathāpihitameva disvā manussā pharasūhi kavāṭe koṭṭetvā anto pavisitvā sabbaṃ nivesanaṃ Aṭṭhikaparipuṇṇaṃ disvā saccaṃ vata so puriso āha nāyaṃ mayhaṃ pajāpati yakkhinī esāti rājā pana kiñci ajānitvā taṃ gahetvā attano bhariyaṃ akāsi sāyaṃ yakkhe pakkositvā sabbajanaṃ khāditvā gatā bhavissatīti āhaṃsu.