Atīte bārāṇasiyaṃ brahmadatte rajjaṃ kārente bodhisatto tassa aggamahesiyā kucchismiṃ paṭisandhiṃ gaṇhitvā vayappatto takkasilāyaṃ sabbasippāni uggaṇhitvā pitu accayena dhammena rajjaṃ kāresi. Tasmiṃ samaye kosalarājā mahantena balena āgantvā bārāṇasiṃ gahetvā taṃ rājānaṃ māretvā tasseva aggamahesiṃ attano aggamahesiṃ akāsi. Bārāṇasīrañño pana putto pitu maraṇakāle niddhamanadvārena palāyitvā balaṃ saṃharitvā bārāṇasiṃ āgantvā avidūre nisīditvā tassa rañño paṇṇaṃ pesesi rajjaṃ vā detu yuddhaṃ vāti. So yuddhaṃ dammīti paṭipaṇṇaṃ pesesi. Rājakumārassa pana mātā taṃ sāsanaṃ sutvā yuddhena kammaṃ natthi tassa satta divasāni sañcāraṃ pacchinditvā bārāṇasīnagaraṃ parivāretu tato dārudakabhattaparikkhayena kilantamanussaṃ nagaraṃ vināva yuddhena gaṇhissatīti paṇṇaṃ pesesi. So mātu sāsanaṃ sutvā satta divasāni sañcāraṃ pacchinditvā nagaraṃ rundhi. Nāgarā sañcāraṃ Alabhamānā sattame divase tassa rañño sīsaṃ gahetvā kumārassa adaṃsu. Kumāro nagaraṃ pavisitvā rajjaṃ gahetvā āyuhapariyosāne yathākammaṃ gato.

So etarahi satta divasāni sañcāraṃ pacchinditvā nagaraṃ rundhitvā gahitakammanissandena satta vassāni lohakumbhiyaṃ vasitvā sattāhaṃ mūḷhagabbhabhāvaṃ āpajjati yampana so padumuttarapādamūle lābhīnaṃ aggo bhaveyyanti mahādānaṃ datvā paṭṭhanaṃ akāsi yañca vipassibuddhakāle nāgarehi saddhiṃ sahassagghanikaṃ guḷadadhiṃ datvā paṭṭhanaṃ akāsi tassānubhāvena lābhīnaṃ aggo jāto. Suppavāsāpi nagaraṃ rundhitvā gaṇha tātāti pesitabhāvena satta vassāni kucchinā gabbhaṃ pariharitvā sattāhaṃ mūḷhagabbhā jātāti. Satthā imaṃ atītaṃ āharitvā abhisambuddho hutvā imaṃ gāthamāha

asātaṃ sātarūpena piyarūpena appiyaṃ

dukkhaṃ sukhassa rūpena pamattamativattatīti .