Tattha asātaṃ sātarūpenāti amadhurameva madhurappaṭirūpakena. Pamattamativattatīti asātaṃ appiyaṃ dukkhanti etaṃ tividhampi etena sātarūpādinā ākārena sativippavāsavasena pamattaṃ puggalaṃ ativattati abhibhavatīti attho. Idaṃ bhagavatā yañca te mātāputtā iminā gabbhapariharaṇagabbhavāsasaṅkhātena asātādinā pubbe nagararundhanasātādippaṭirūpakena ajjhotthaṭā yañca idāni sā upāsikā punapi sattakkhattuṃ evarūpaṃ asātaṃ appiyaṃ dukkhaṃ pemavatthubhūtena Puttasaṅkhātena sātādippaṭirūpakena ajjhotthaṭā hutvā tathā vacanaṃ sabbampi sandhāya vuttanti veditabbaṃ.

Satthā imaṃ dhammadesanaṃ āharitvā jātakaṃ samodhānesi tadā nagaraṃ rundhitvā rajjaṃ pattakumāro sīvali ahosi mātā suppavāsā pitā pana bārāṇasīrājā ahamevāti.

Asātarūpajātakaṃ dasamaṃ.

Littavaggo dasamo.