soḷasābhi ca battiṃsa atricchaṃ cakkamāsado

icchāhatassa posassa cakkaṃ bhamati matthaketi.

Tattha catubbhi aṭṭhajjhagamāti samuddantare catasso vimānapetiyo labhitvā tāhi asantuṭṭho atricchatāya purato gantvā aparā aṭṭhapi adhigatosīti attho. Sesapadadvayepi eseva nayo. Atricchaṃ cakkamāsadoti evaṃ sakalābhena asantuṭṭho atricchaṃ atra atra icchanto purato lābhaṃ paṭṭhento idāni cakkamāsado idaṃ uracakkaṃ pattosi tassa te evaṃ icchāhatassa posassa taṇhāya hatassa upahatassa tava cakkaṃ bhamati matthake pāsāṇacakkaṃ ayacakkanti imesu dvīsu khuradhāraṃ ayacakkaṃ tassa matthake punappunaṃ pavattanavasena bhamantaṃ disvā evamāha.

Vatvā ca pana attano devalokameva gato. Sopi nerayikasatto attano pāpe khīṇe yathākammaṃ gato.