Sāpi kho vaṇṇadāsī taṃ kolāhalasaddaṃ sutvā kiṃsaddo nāmesoti pucchitvā taṃ pavuttiṃ sutvā vegena otaritvā ussaratha sāmi maṃ rājapurisānaṃ daṭṭhuṃ dethāti attānaṃ dasseti. Rājapurisā taṃ disvā mātaraṃ sampaṭicchāpetvā seṭṭhiputtaṃ muñcitvā pakkamiṃsu. So sahāyaparivutova nadiṃ gantvā sīsaṃ nhāyitvā gehaṃ gantvā Bhuttapātarāso mātāpitaro pabbajjaṃ anujānāpetvā cīvarasāṭake ādāya mahantena parivārena satthu santikaṃ gantvā vanditvā pabbajjaṃ yācitvā pabbajjañca upasampadañca labhitvā avissaṭṭhakammaṭṭhāno vipassanaṃ vaḍḍhetvā nacirasseva arahatte patiṭṭhāsi. Athekadivasaṃ dhammasabhāyaṃ sannipatitā bhikkhū āvuso uttaraseṭṭhiputto attano bhaye uppanne sāsanassa guṇaṃ jānitvā imamhā dukkhā muccamāno pabbajissāmīti cintetvā tena sucintitena maraṇamutto ceva pabbajito ca aggaphale patiṭṭhitoti tassa guṇakathaṃ kathesuṃ. Satthā āgantvā kāya nuttha bhikkhave etarahi kathāya sannisinnāti pucchitvā imāya nāmāti vutte na bhikkhave uttaraseṭṭhiputtova bhaye uppanne iminā upāyena imamhā dukkhā muccissāmīti cintetvā maraṇabhayā mutto atīte paṇḍitāpi attano bhaye uppanne imamhā dukkhā muccissāmīti cintetvā maraṇabhayadukkhato mucciṃsuyevāti vatvā atītaṃ āhari.
Atīte bārāṇasiyaṃ brahmadatte rajjaṃ kārente bodhisatto cutipaṭisandhivasena parivattento vaṭṭakayoniyaṃ nibbatti. Tadā eko vaṭṭakaluddako araññā bahū vaṭṭake āharitvā gehe ṭhapetvā gocaraṃ datvā manussānaṃ mūlaṃ gahetvā āgatānaṃ hatthe vaṭṭake vikkiṇanto jīvikaṃ kappeti. So ekadivasaṃ bahūhi vaṭṭakehi saddhiṃ bodhisattampi gahetvā ānesi. Bodhisatto cintesi sacāhaṃ iminā dinnaṃ gocaraṃ pānīyañca paribhuñjissāmi ayaṃ maṃ gahetvā Āgatānaṃ manussānaṃ dassati sace panāhaṃ na paribhuñjissāmi ahaṃ milāyissāmi atha maṃ milātaṃ disvā manussā na gaṇhissanti evaṃ me sotthi bhavissati imaṃ upāyaṃ karissāmīti. So tathā karonto milāyitvā aṭṭhicammamatto ahosi. Manussā taṃ disvā na gaṇhiṃsu. Luddako bodhisattaṃ ṭhapetvā sesesu vaṭṭakesu parikkhīṇesu pacchito nīharitvā dvāre ṭhapetvā bodhisattaṃ hatthatale katvā kiṃ nu kho ayaṃ vaṭṭakoti naṃ oloketuṃ āraddho. Athassa pamattabhāvaṃ ñatvā bodhisatto pakkhe pasāretvā uppatitvā araññameva gato. Aññe vaṭṭakā taṃ disvā kiṃ nu kho na paññāyasi kahaṃ gatosīti pucchitvā luddakena gahitomhīti vutte kinti katvā muttosīti pucchiṃsu. Bodhisatto ahaṃ tena dinnagocaraṃ agahetvā pānīyaṃ apivitvā upāyacintāvasena muttoti vatvā imaṃ gāthamāha