Athassa paccanto kupito. Paccante ṭhitā yodhā corehi saddhiṃ dve tayo saṅgāme katvā ito uttariṃ mayaṃ na sakkomāti rañño paṇṇaṃ pesesuṃ. Rājā tattha gantukāmo balakāyaṃ saṃharitvā taṃ pakkositvā bhadde ahaṃ paccantaṃ gacchāmi tattha nānappakārāni yuddhāni honti jayaparājayopi anibaddho tādisesu ṭhānesu mātugāmo dupparihāro tvaṃ idheva nivattāhīti āha. Sāpi na sakkā deva mayā nivattitunti punappunaṃ raññā paṭikkhittā āha tenahi ekekaṃ yojanaṃ gantvā mayhaṃ sukhadukkhaṃ jānanatthaṃ ekekaṃ manussaṃ peseyyāthāti. Rājā sādhūti sampaṭicchitvā bodhisattaṃ nagare ṭhapetvā mahantena balakāyena nikkhamitvā gacchanto yojane yojane ekekaṃ purisaṃ amhākaṃ ārogyaṃ ārocetvā deviyā sukhadukkhaṃ jānitvā āgacchāti pesesi. Sā āgatāgatapurisaṃ rājā taṃ kimatthaṃ pesesīti pucchitvā tumhākaṃ sukhadukkhaṃ jānanatthāyāti vutte tenahi ehīti tena saddhiṃ asaddhammaṃ paṭisevati. Rājā dvattiṃsayojanamaggaṃ gacchanto dvattiṃsa jane pesesi. Sā sabbehi tehi saddhiṃ tatheva akāsi.
Rājā paccantaṃ vūpasametvā janapadaṃ samassāsetvā puna āgacchanto tatheva dvattiṃsa jane pesesi. Sā tehipi saddhiṃ vippaṭipajjiyeva. Rājā āgantvā jayakhandhāvāraṭṭhāne ṭhatvā nagaraṃ paṭijaggāpetūti bodhisattassa paṇṇaṃ pesesi. Bodhisatto sakalanagaraṃ paṭijaggāpetvā rājanivesanaṃ paṭijaggāpento deviyā vasanaṭṭhānaṃ agamāsi. Sā bodhisattassa rūpasobhaggappattaṃ kāyaṃ disvā saṇṭhātuṃ asakkontī ehi brāhmaṇa sayanaṃ abhiruhāti āha. Bodhisatto mā evaṃ avaca rājāpi me garu akusalāpi bhāyāmi na sakkā mayā evaṃ kātunti āha. Catussaṭṭhiyā pādamūlikānaṃ neva rājā garu na akusalā bhāyanti taveva rājā garu tvaṃyeva ca akusalā bhāyasīti. Āma sace tesampi evaṃ bhaveyya na evarūpaṃ kareyyaṃ ahampana jānamāno evarūpaṃ sāhasikakammaṃ na karissāmīti. Kiṃ bahuṃ vippalapasi sace me vacanaṃ na karosi sīsante chindāpessāmīti. Tiṭṭhatu ekasmiṃ attabhāve sīsaṃ attabhāvasahassepi sīse chindantena na sakkā mayā evarūpaṃ kātunti. Sā hotu jānissāmīti bodhisattaṃ tajjetvā attano gabbhaṃ pavisitvā sarīre nakhavalañjaṃ dassetvā telena gattāni abbhañjitvā kiliṭṭhavatthaṃ nivāsetvā gilānālayaṃ katvā dāsiyo āṇāpesi raññā kahaṃ devīti vutte gilānāti katheyyāthāti.