abaddhā tattha bajjhanti yattha bālā pabhāsare

baddhāpi tattha muccanti yattha dhīrā pabhāsareti.

Tattha abaddhāti abandhitabbayuttakā. Pabhāsareti pabhāsanti vadanti kathenti.

Evaṃ bodhisatto imāya gāthāya rañño dhammaṃ desetvā mayā idaṃ dukkhaṃ agāre vasanabhāvena laddhaṃ idāni me agārena kiccaṃ natthi pabbajjaṃ me anujānātha devāti pabbajjaṃ anujānāpetvā assumukhaṃ ñātijanaṃ mahantañca vibhavaṃ pahāya isipabbajjaṃ pabbajitvā himavante vasanto abhiññā ca samāpattiyo ca nibbattetvā brahmalokaparāyano ahosi.