yasaṃ laddhāna dummedho anatthaṃ carati attano

attano ca paresañca hiṃsāya paṭipajjatīti.

Tatrāyaṃ saṅkhepattho mahārāja tādiso dummedho nippañño puggalo parivārasampattiṃ labhitvā attano anatthaṃ carati. Kiṃkāraṇā. So hi yasamadamatto kattabbākattabbaṃ ajānanto attano ca paresañca hiṃsāya paṭipajjati hiṃsā vuccati kilamanadukkhuppādanaṃ tadatthāya evaṃ paṭipajjatīti.

Evaṃ imāya gāthāya rañño dhammaṃ desetvā tiṭṭhadāni tvanti ākāse uppatitvā bārāṇasīnagarameva gantvā rājaṅgaṇe ākāse aṭṭhāsi. Sakalanagaraṃ saṅkhubhitvā amhākaṃ rañño ākāsena setavāraṇo āgantvā rājaṅgaṇe ṭhitoti ekakolāhalaṃ ahosi. Vegena rañño ārocesuṃ. Rājā nikkhamitvā sace mayhaṃ upabhogatthāya āgatosi bhūmiyaṃ patiṭṭhāhīti āha. Bodhisatto bhūmiyaṃ patiṭṭhāsi. Ācariyo otaritvā rājānaṃ vanditvā kuto āgatosi tātāti vutto rājagahatoti vatvā sabbaṃ pavuttiṃ ārocesi. Rājā manāpaṃ te tāta kataṃ idhāgacchantenāti haṭṭhatuṭṭho nagaraṃ sajjāpetvā vāraṇaṃ maṅgalahatthiṭṭhāne ṭhapetvā sakalarajjaṃ tayo koṭṭhāse katvā ekaṃ bodhisattassa adāsi ekaṃ ācariyassa ekaṃ attanā aggahesi. Bodhisattassa āgatakālato paṭṭhāyayeva pana rañño sakalajambūdīpe rajjaṃ hatthagatameva jātaṃ. Jambūdīpe aggarājā hutvā dānādīni puññāni katvā yathākammaṃ gato.