yathā vācā ca bhuñjassu yathā bhuttañca byāhara

ubhayante na sameti vācā bhuttañca kosiyeti.

Tattha yathā vācā ca bhuñjassūti yathā te vācā tathā ca bhuñjassu vātā me vijjhantīti vācāya anucchavikameva katvā bhuñjassūti attho. Yathāvācaṃ vātipi pāṭho yuttaṃ. Yathāvācāyātipi paṭhanti. Sabbattha ayamettha attho. Yathābhuttañca byāharāti yante bhuttaṃ tassa anucchavikameva byāhara arogamhīti vatvā gehe kattabbakammaṃ karohīti attho. Yathābhūtañcātipi pāṭho. Athavā. Arogamhīti yathābhūtameva vatvā kammaṃ karohīti Attho. Ubhayante na sameti vācā bhuttañca kosiyeti yā ca te ayaṃ vācā vātā maṃ vijjhantīti yañca te idaṃ paṇītabhojanaṃ bhuttaṃ idaṃ ubhayaṃpi tuyhaṃ na sameti tasmā uṭṭhāya kammaṃ karohi. Kosiyeti taṃ gottena ālapati.

Evaṃ vutte kosiyabrāhmaṇadhītā ācariyena ussukkaṃ āpannakālato paṭṭhāya na sakkā mayā evaṃ vañcetuṃ uṭṭhāya kammaṃ karissāmīti uṭṭhāya kammaṃ akāsi ācariyena me dussīlabhāvo ñāto na idāni sakkā ito paṭṭhāya puna evarūpaṃ kātunti ācariye gāravena pāpakammatopi viramitvā sīlavatī ahosi.