Atīte magadharaṭṭhe rājagahe ekasmiṃ magadharaññe rajjaṃ kārente bodhisatto tasseva seṭṭhī ahosi asītikoṭivibhavo saṅkhaseṭṭhī nāmena. Bārāṇasiyaṃ piliyaseṭṭhī nāma asītikoṭivibhavo ahosi. Te aññamaññaṃ sahāyakā ahesuṃ. Tesu bārāṇasiyaṃ piliyaseṭṭhissa kenacideva karaṇīyena mahantaṃ bhayaṃ uppajji. Sabbaṃ sāpateyyaṃ parihāyati. So daliddo appaṭisaraṇo hutvā bhariyaṃ ādāya saṅkhaseṭṭhiṃ paccayaṃ katvā bārāṇasito nikkhamitvā padasāva rājagahaṃ gantvā saṅkhaseṭṭhissa nivesanaṃ agamāsi. So taṃ disvāva sahāyo me āgatoti parissajjitvā sakkārasammānaṃ katvā katipāhaṃ vītināmetvā ekadivasaṃ samma kenatthena āgatosīti pucchi. Bhayaṃ me samma uppannaṃ Sabbaṃ dhanaṃ parikkhīṇaṃ upatthambho me hohīti. Sopi sādhu samma mā bhāyīti bhaṇḍāgāraṃ vivarāpetvā cattāḷīsa hiraññakoṭiyo dāpetvā sesaṃpi paricchedaparivāraṃ sabbaṃ attano santakaṃ saviññāṇakaṃ aviññāṇakaṃ majjhe bhinditvā upaḍḍhameva adāsi. So taṃ vibhavaṃ ādāya puna bārāṇasiṃ gantvā nivāsaṃ kappesi.
Aparabhāge saṅkhaseṭṭhissāpi tādisameva bhayaṃ uppajji. So attano paṭisaraṇaṃ upadhārento sahāyassa me mahāupakāro kato upaḍḍhavibhavo dinno na so maṃ disvā pariccajissati tassa santikaṃ gamissāmīti cintento bhariyaṃ ādāya padasāva bārāṇasiṃ gantvā bhariyaṃ āha bhadde tava mayā saddhiṃ antaravīthiyaṃ gamanannāma na yuttaṃ mayā pesitayānaṃ āruyha mahantena parivārena pacchā āgamissasi yāva yānaṃ pesemi tāva idheva hohīti vatvā taṃ sālāyaṃ ṭhapetvā sayaṃ nagaraṃ pavisitvā seṭṭhissa gharaṃ gantvā rājagahanagarato tumhākaṃ sahāyo saṅkhaseṭṭhī nāma āgatoti ārocāpesi. So āgacchatūti pakkosāpetvā taṃ disvā neva āsanā vuṭṭhāsi na paṭisaṇṭhāramakāsi kevalaṃ kimatthaṃ āgatosīti pucchi. Tumhākaṃ dassanatthaṃ āgatomhīti. Nivāso te kahaṃ gahitoti. Na tāva nivāsanaṭṭhānaṃ atthi seṭṭhigharaṇimpi sālāyaṃ ṭhapetvā āgatomhīti. Tumhākaṃ idha nivāsanaṭṭhānaṃ natthi nivāpaṃ gahetvā ekasmiṃ ṭhāne pacāpetvā bhuñjitvā gacchatha puna amhe mā passitthāti vatvā mayhaṃ sahāyassa dussante bandhitvā ekaṃ Bahalapalāpatumbaṃ dehīti dāsaṃ āṇāpesi. Taṃ divasaṃ kira so rattasālīnaṃ sakaṭasahassamattaṃ odhunāpetvā koṭṭhāgāraṃ pūrāpesi cattāḷīsakoṭidhanaṃ gahetvā āgato akataññū mahācoro sahāyassa tumbamatte palāpe dāpesi. Dāso pacchiyaṃ ekaṃ palāpatumbaṃ pakkhipitvā bodhisattassa santikaṃ agamāsi. Bodhisatto cintesi ayaṃ asappuriso mama santikā cattāḷīsakoṭidhanaṃ labhitvā idāni palāpatumbaṃ dāpesi gaṇhāmi nu kho mā gaṇhāmīti. Athassa etadahosi ayaṃ tāva akataññū mittadubbhī katavināsakabhāvena mayā saddhiṃ mittabhāvaṃ bhindi sacāhaṃ etena dinnaṃ palāpatumbaṃ lāmakattā na gaṇhissāmi ahaṃ mittabhāvaṃ bhindissāmi andhabālā parittakaṃ laddhaṃ agaṇhantā mittabhāvaṃ vināsenti ahampana etena dinnaṃ palāpatumbaṃ gahetvā mama vasena mittabhāvaṃ patiṭṭhāpessāmīti. So palāpatumbaṃ dussante bandhitvā pāsādā oruyha sālaṃ agamāsi. Atha naṃ bhariyā kinte ayya laddhanti pucchi. Bhadde amhākaṃ sahāyo piliyaseṭṭhī palāpatumbaṃ datvā amhe ajjeva vissajjesīti. Sā ayya kimatthaṃ aggahesi kiṃ etaṃ cattāḷīsakoṭidhanassa anucchavikanti rodituṃ ārabhi. Bodhisatto bhadde mā rodi ahaṃ tena saddhiṃ mittabhedabhayena mama vasena mittabhāvaṃ ṭhapetuṃ gaṇhiṃ tvaṃ kiṃkāraṇā rodasīti vatvā imaṃ gāthamāha