Tattha asampadānenāti asappadānena. Saralopena sandhi. Agahaṇenāti attho. Itarītarassāti yassakassaci lāmakālāmakassāpi. Bālassa mittāni kalī bhavantīti dandhassa appaññassa mittāni kalī nāma kāḷakaṇṇisadisāni honti bhijjantīti attho. Tasmā harāmi bhusaṃ aḍḍhamānanti tena kāraṇenāhaṃ sahāyena dinnaṃ ekaṃ palāpatumbaṃ harāmi gaṇhāmīti dasseti. Mānanti hi aṭṭhannaṃ nāḷīnaṃ nāmaṃ. Catunnaṃ aḍḍhamānānaṃ catasso ca nāḷiyo tumbo nāma. Tena vuttaṃ palāpatumbanti. Mā me mitti bhijjittha sassatāyanti mama sahāyena saddhiṃ mitti mā bhijjittha sassatāva ayaṃ hotūti attho.
Evaṃ vutte ca seṭṭhibhariyā rodateva. Tasmiṃ khaṇe saṅkhaseṭṭhinā piliyaseṭṭhissa dinno kammantadāso sālādvārena āgacchanto seṭṭhibhariyāya rodanasaddaṃ sutvā sālaṃ pavisitvā attano sāmike disvā pādesu patitvā roditvā kanditvā kimatthaṃ idhāgatattha sāmīti pucchi. Seṭṭhī sabbaṃ ārocesi. Kammantadāso hotu sāmi mā cintetthāti ubho samassāsetvā attano gehaṃ netvā gandhodakena nhāpetvā bhojetvā sāmikā vo āgatāti sesadāse sannipātetvā dassetvā katipāhaṃ vītināmetvā sabbe dāse gahetvā rājaṅgaṇaṃ gantvā uparavamakāsi. Rājā Pakkosāpetvā kiṃ etanti pucchi. Te sabbaṃ taṃ pavuttiṃ rañño ārocesuṃ. Rājā tesaṃ vacanaṃ sutvā ubhopi seṭṭhī pakkosāpetvā saṅkhaseṭṭhiṃ pucchi saccaṃ kira tayā mahāseṭṭhi piliyaseṭṭhissa cattāḷīsakoṭidhanaṃ dinnanti. Mahārāja mama sahāyassa maṃ takketvā rājagahaṃ āgatassa na kevalaṃ dhanaṃ sabbaṃ vibhavajātaṃ saviññāṇakāviññāṇakaṃ dve koṭṭhāse katvā samabhāgaṃ adāsinti. Rājā saccametanti piliyaseṭṭhiṃ pucchi. Āma devāti. Tayā panassa taññeva takketvā āgatassa atthi koci sakkāro vā sammāno vā katoti. So tuṇhī ahosi. Apica pana te etassa palāpatumbamattaṃ dussante pakkhipāpetvā dāpitaṃ atthīti. Tampi sutvā tuṇhīyeva ahosi. Rājā kiṃ kātabbanti amaccehi saddhiṃ mantetvā taṃ paribhāsitvā gacchatha piliyaseṭṭhissa ghare sabbaṃ vibhavaṃ saṅkhaseṭṭhissa dethāti āha. Bodhisatto mahārāja mayhaṃ parasantakena attho natthi mayā dinnamattameva pana dāpethāti āha. Rājā bodhisattassa santakaṃ dāpesi. Bodhisatto sabbaṃ attanā dinnavibhavaṃ paṭilabhitvā dāsaparivuto rājagahameva gantvā kuṭumbaṃ saṇṭhapetvā dānādīni puññāni katvā yathākammaṃ gato.