tā tattha panudī satthā tūlaṃ bhaṭṭhaṃva mālutoti evaṃ yāva pariyosānā tassa suttantassa kathitakāle dhammasabhāyaṃ sannipatitā bhikkhū kathaṃ samuṭṭhāpesuṃ āvuso sammāsambuddho māradhītaro anekasatāni dibbarūpāni māpetvā palobhanatthāya upasaṅkamantiyo akkhīni ummiletvā na olokesi aho buddhabalannāma acchariyanti. Satthā āgantvā kāya nuttha bhikkhave etarahi kathāya sannisinnāti pucchitvā imāya nāmāti vutte na bhikkhave idāneva mayhaṃ sabbāsave khepetvā sabbaññutaṃ pattassa māradhītānaṃ anolokanaṃ nāma acchariyaṃ ahañhi pubbe bodhiñāṇaṃ pariyesamāno sakkilesakāle hi abhisaṅkhataṃ dibbarūpampi indriyāni bhinditvā kilesavasena anoloketvāva gantvā mahārajjaṃ pāpuṇinti vatvā atītaṃ āhari.

Atīte bārāṇasiyaṃ brahamdatte rajjaṃ kārente bodhisatto bhātikasatassa kaniṭṭho ahosi. Sabbaṃ heṭṭhā takkasilajātake vuttanayeneva vitthāretabbaṃ. Tadā pana takkasilānagaravāsīhi bahinagare Sālāya bodhisattaṃ upasaṅkamitvā yācitvā rajjaṃ paṭicchāpetvā abhiseke kate takkasilānagaravāsino nagaraṃ devanagaraṃ viya rājabhavanañca indabhavanaṃ viya alaṅkariṃsu. Tadā bodhisatto nagaraṃ pavisitvā rājabhavane pāsāde mahātale samussāpitasetacchattaṃ ratanavarapallaṅkaṃ āruyha devarājalīḷhāya nisīdi. Amaccā ca brāhmaṇagahapatikādayo ca khattiyakumārā ca sabbālaṅkārappaṭimaṇḍitā parivāretvā aṭṭhaṃsu. Devaccharappaṭibhāgā soḷasasahassanāṭakitthiyo naccagītavāditakusalā uttamavilāsasampannā naccagītavāditāni payojesuṃ. Gītavāditasaddena rājabhavanaṃ meghatthanitapūrito mahāsamuddakucchi viya ekaninnādaṃ ahosi. Bodhisatto taṃ attano sirisobhaggappattaṃ olokayamāno cintesi sacāhaṃ tāsaṃ yakkhinīnaṃ abhisaṅkhataṃ dibbarūpaṃ olokissaṃ jīvitakkhayaṃ patto abhavissaṃ imaṃ sirisobhaggaṃ na olokissaṃ paccekabuddhānaṃ pana ovāde ṭhitabhāvena idaṃ mayā pattanti evañca pana cintetvā udānaṃ udānento imaṃ gāthamāha