Tadā bodhisatto asītisahassakākaparivāro mahāsusāne vasati. Eko kāko āgantvā kākānaṃ uppannaṃ bhayaṃ bodhisattassa ārocesi. So cintesi ṭhapetvā maṃ añño mayhaṃ ñātakānaṃ uppannaṃ bhayaṃ harituṃ samattho natthi harissāmi nanti dasa pāramiyo āvajjetvā mettāpāramiṃ purecārikaṃ katvā ekavegeneva pakkhanditvā vivaṭamahāvātapāne pavisitvā rañño āsanassa heṭṭhā pāvisi. Atha naṃ eko manusso gahetukāmo ahosi. Rājā saraṇaṃ paviṭṭho mā gaṇhīti vāresi. Mahāsatto thokaṃ vissamitvā mettāpāramiṃ āvajjetvā heṭṭhāsanā nikkhamitvā rājānaṃ āha mahārāja raññā nāma chandādivasena agantvā rajjaṃ kāretuṃ vaṭṭati yaṃ yaṃ kammaṃ kattabbaṃ hoti sabbaṃ nisamma upadhāretvā kātuṃ vaṭṭati yañca kariyamānaṃ nippajjati tadeva kātuṃ vaṭṭati na itaraṃ sace hi rājāno kariyamānaṃ na nippajjati taṃ karonti mahājanassa maraṇabhayapariyosānaṃ mahābhayaṃ uppajjati purohito veravasiko hutvā Musāvādaṃ abhāsi kākānaṃ vasā nāma natthīti. Taṃ sutvā rājā pasannacitto bodhisattaṃ kāñcanabhaddapīṭhe nisīdāpetvā tattha nisinnassa pakkhantarāni satapākasahassapākatelehi makkhāpetvā kāñcanataṭṭake rājārahaṃ sucibhojanaṃ bhojāpetvā pānīyaṃ pāyetvā suhitaṃ vigatadarakaṃ mahāsattaṃ etadavoca paṇḍita tvaṃ kākānaṃ vasā nāma natthīti vadesi kena kāraṇena nesaṃ vasā natthīti. Bodhisatto iminā ca iminā ca kāraṇenāti sakalanivesanaṃ ekasaddaṃ katvā dhammaṃ desento imaṃ gāthamāha

niccaṃ ubbiggahadayā sabbalokavihesakā

tasmā nesaṃ vasā natthi kākānamhāka ñātinanti.

Tatrāyaṃ saṅkhepattho mahārāja kākā nāma niccaṃ ubbiggamānasā bhayappattāva viharanti. Sabbalokavihesakāti khattiyādayo manussepi itthīpurisepi kumārakumārikādayopi viheṭhentā kilamantā vicaranti tasmā imehi dvīhi kāraṇehi nesaṃ amhākaṃ ñātīnaṃ kākānaṃ vasā nāma natthi atītepi abhūtapubbā anāgatepi na bhavissantīti.