So gacchante kāle mānaṃ vaḍḍheti ahampi catuppadova kiṃkāraṇā divase divase parehi posiyamāno viharāmi ito paṭṭhāya ahampi hatthiādayo paharitvā maṃsaṃ khādissāmi sīhopi migarājā viroca sāmīti vuttameva padaṃ nissāya vāraṇe vadhesi ahaṃ sīhena viroca jambukāti maṃ vadāpetvā ekaṃ varavāraṇaṃ vadhitvā maṃsaṃ khādissāmīti. So sīhaṃ upasaṅkamitvā etadavoca sāmi mayā dīgharattaṃ tumhehi vadhitavaravāraṇānaṃ maṃsaṃ khāditaṃ ahampi ekaṃ vāraṇaṃ paharitvā maṃsaṃ khāditukāmo tasmā tumhehi nipannaṭṭhāne Kāñcanaguhāyaṃ nipajjissāmi tumhe pabbatapāde vicarantaṃ varavāraṇaṃ oloketvā mama santikaṃ āgantvā viroca jambukāti vadetha ettakamattampi maccheraṃ mā karitthāti. Atha naṃ sīho āha na tvaṃ jambuka vāraṇe vadhituṃ samattho sīhakule uppanno vāraṇaṃ paharitvā maṃsaṃ khādanasamattho sigālo nāma loke natthi mā te evaṃ rucci mayā vadhitavaravāraṇānaññeva maṃsaṃ khāditvā vasassūti. So evaṃ vuttopi oramituṃ na icchi punappunaṃ yāciyeva. Sīho taṃ nivāretuṃ asakkonto sampaṭicchitvā tenahi mama vasanaṭṭhānaṃ pavisitvā nipajjāti jambukaṃ kāñcanaguhāyaṃ nipajjāpetvā sayaṃ pabbatapāde mattavaravāraṇaṃ oloketvā guhādvāraṃ gantvā viroca jambukāti āha. Sigālo kāñcanaguhāya nikkhamitvā vijambhitvā catuddisaṃ oloketvā tikkhattuṃ vassitvā mattavāraṇassa kumbhe patissāmīti virajjhitvā pādamūle pati. Vāraṇo dakkhiṇapādaṃ ukkhipitvā tassa sīsaṃ akkami. Sīsaṭṭhīni cuṇṇavicuṇṇāni ahesuṃ. Athassa sarīraṃ vāraṇo pādena ghaṃsitvā rāsiṃ katvā upari laṇḍaṃ pātetvā koñcanādaṃ nadanto araññaṃ pāvisi. Bodhisatto imaṃ pavuttiṃ disvā idāni viroca jambukāti vatvā imaṃ gāthamāha

lasī ca te nipphalitā matthako ca paphālito

sabbā te phāsukā bhaggā ajja kho tvaṃ virocasīti.

Tattha lasīti matthaluṅgaṃ. Nipphalitāti nikkhantā.