Atīte bārāṇasiyaṃ brahmadatte rajjaṃ kārente bodhisatto samuddadevatā hutvā nibbatti. Atheko kāko attano bhariyaṃ kākiṃ ādāya gocaraṃ pariyesamāno samuddatīraṃ agamāsi. Tasmiṃ Kāle manussā samuddatīre khīrapāyāsamacchamaṃsasurādīhi nāgabalikammaṃ katvā pakkamiṃsu. Atheko kāko balikammaṭṭhānaṃ gantvā khīrādīni disvā saddhiṃ kākiyā khīrapāyāsamacchamaṃsādīni paribhuñjitvā bahuṃ suraṃ pivi. Te ubho surāmadamattā samuddakīḷaṃ kīḷissāmāti velante nisīditvā nhāyituṃ ārabhiṃsu. Athekā ummi āgantvā kākiṃ gahetvā samudde pavesesi. Tameko maccho saṃharitvā ajjhohari. Kāko bhariyā me matāti rodi paridevi. Athassa paridevanasaddaṃ sutvā bahū kākā sannipatitvā kiṃkāraṇā rodasīti pucchiṃsu. Sahāyikā vo velante nhāyamānā ummiyā haṭāti. Te sabbepi ekaravaṃ ravantā rodiṃsu. Atha nesaṃ etadahosi imaṃ samuddūdakaṃ nāma amhākaṃ kiṃ pahosi udakaṃ ussiñcitvā samuddaṃ tucchaṃ katvā sahāyikaṃ nīharissāmāti. Te mukhaṃ pūretvāva udakaṃ bahi chaḍḍenti loṇūdakena ca gale sussamāne uṭṭhāyuṭṭhāya thalaṃ gantvā vissamanti. Te hanūsu kilamantesu mukhesu sukkhantesu akkhīsu rattesu kilamantā hutvā aññamaññaṃ āmantetvā ambho mayaṃ samuddā udakaṃ gahetvā bahi pātema gahitagahitaṭṭhānaṃ puna udakena pūreti samuddaṃ tucchaṃ kātuṃ na sakkhissāmāti vatvā imaṃ gāthamāhaṃsu

api nū hanukā santā mukhañca parisussati

oramāma na pārema pūrateva mahodadhīti.

Tattha api nū hanukā santāti api amhākaṃ hanukā kilantā. Oramāma na pāremāti mayaṃ attano balena mahāsamuddā udakaṃ ākaḍḍhamānā osārema tucchaṃ pana naṃ kātuṃ na sakkoma ayañhi pūrateva mahodadhīti.