Iti so tāya punappunaṃ kathentiyā kilesavasena vacanaṃ gahetvā Hotu bhadde mā cintayitthāti taṃ samassāsetvā rattibhāge jīvitaṃ pariccajitvā nagarā nikkhamitvā rañño kusumbhavatthuṃ gantvā vatiṃ madditvā antovatthuṃ pāvisi. Ārakkhamanussā vatisaddaṃ sutvā coro coroti parivāretvā gahetvā paribhāsitvā koṭṭetvā bandhitvā pabhātāya rattiyā rañño dassesuṃ. Rājā gacchatha naṃ sūle uttāsethāti āha. Atha naṃ pacchābāhuṃ bandhitvā vajjhabheriyā vajjamānāya nagarā nikkhāmetvā sūle uttāsesuṃ. Balavavedanā vattanti. Kākā sīse nilīyitvā kaṇayaggasadisehi tuṇḍehi akkhīni vijjhanti. So tathārūpampi dukkhaṃ amanasikaritvā tameva itthiṃ anussaritvā tāya nāmamhi ghanapuppharattanivatthāya kaṇṭhe āsattabāhuyugalāya saddhiṃ kattikarattivārato parihīnoti vatvā imaṃ gāthamāha

nayidaṃ dukkhaṃ aduṃ dukkhaṃ yaṃ maṃ tudati vāyaso

yaṃ sāmā puppharattena kattikaṃ nānubhossatīti.

Tattha nayidaṃ dukkhaṃ aduṃ dukkhaṃ yaṃ maṃ tudati vāyasoti yañca idaṃ sūle lagganapaccayaṃ kāyikacetasikadukkhaṃ yañca lohamayehi viya tuṇḍehi vāyaso tudati idaṃ sabbaṃpi mayhaṃ na dukkhaṃ aduṃ dukkhaṃ etaṃyeva pana me dukkhanti attho. Kataraṃ. Yaṃ sāmā puppharattena kattikaṃ nānubhossatīti yaṃ sā piyaṅgusāmā mama bhariyā ekaṃ kusumbharattaṃ nivāsetvā ekaṃ pārupitvāpi ekaghanapuppharattena vatthayugena acchannā maṃ kaṇṭhe gahetvā kattikarattivāraṃ Nānubhossati imaṃ mayhaṃ dukkhaṃ etadeva hi maṃ bādhatīti.