Atīte bārāṇasiyaṃ brahmadatte rajjaṃ kārente bodhisatto sigālayoniyaṃ paṭisandhiṃ gahetvā araññe nadītīre nivāsaṃ kappesi. Atheko jarahatthī gaṅgātīre kālamakāsi. Sigālo gocarappasuto taṃ hatthisarīraṃ disvā mahā me gocaro uppannoti taṃ gantvā soṇḍe ḍaṃsi. Naṅgalīsāya daṭṭhakālo viya ahosi. So Natthettha khāditabbayuttakanti dantesu ḍaṃsi. Thambhe daṭṭhakālo viya ahosi. Kaṇṇe ḍaṃsi. Suppakoṭiyaṃ daṭṭhakālo viya ahosi. Udare ḍaṃsi. Kusūle daṭṭhakālo viya ahosi. Pāde ḍaṃsi. Udukkhale daṭṭhakālo viya ahosi. Naṅguṭṭhe ḍaṃsi. Musale daṭṭhakālo viya ahosi. So etthāpi natthi khāditabbayuttakanti sabbattha assādaṃ alabhanto vaccamagge ḍaṃsi. Mudupūve daṭṭhakālo viya ahosi. So laddhandāni me imasmiṃ sarīre muduṃ khāditabbayuttakaṭṭhānanti tato paṭṭhāya khāditvā antokucchiṃ pavisitvā vakkahadayādīni khāditvā pipāsitakāle lohitaṃ pivitvā nipajjitukāmakāle udaraṃ ottharitvā nipajjati. Athassa etadahosi idaṃ hatthisarīraṃ mayhaṃ nivāsanasukhatāya gehasadisaṃ khāditukāmatāya sati pahūtamaṃsaṃ kindāni me aññattha gamananti. So aññattha agantvā hatthikucchiyameva maṃsaṃ khāditvā vasati.
Gacchante gacchante kāle nidāghasamaye vātasamphassena ceva suriyarasmisantāpena ca taṃ kuṇapaṃ sussitvā valiyo gaṇhi. Sigālassa paviṭṭhadvāraṃ pihitaṃ. Antokucchi andhakāro ahosi. Sigālassa lokantarikanivāso viya jāto. Kuṇape sussante maṃsampi sussi. Lohitampi pacchijji. So nikkhamanadvāraṃ alabhanto bhayappatto hutvā sandhāvanto ito cito ca paharitvā nikkhamanadvāraṃ pariyesamāno vicarati. Evaṃ tasmiṃ ukkhaliyaṃ piṭṭhapiṇaḍaṃ viya antokucchiyaṃ nipajjamāne katipāhaccayena mahāmegho pāvassi. Atha Naṃ kuṇapaṃ temitvā uṭṭhāya pakatisaṇṭhānena aṭṭhāsi. Vaccamaggo vivaṭo hutvā tārakā viya paññāyi. Sigālo taṃ chiddaṃ disvā idāni me jīvitaṃ laddhanti yāva hatthisīsā paṭikkamitvā vegena pakkhanditvā vaccamaggaṃ sīsena paharitvā nikkhami. Tassa sussinnasarīrattā sabbalomāni vaccamaggeyeva allīyiṃsu. So tālakkhandhasadisena nillomena sarīrena ubbiggacitto muhuttaṃ dhāvitvā nivattitvā nisinno sarīraṃ oloketvā idaṃ dukkhaṃ mayhaṃ na aññena kataṃ lobhahetu pana lobhakāraṇā lobhaṃ nissāya mayā etaṃ kataṃ itodāni paṭṭhāya na lobhavasiko bhavissāmi puna hatthisarīrannāma na pavisissāmīti saṃviggahadayo hutvā imaṃ gāthamāha