Tassa taṃ pavuttiṃ ñatvā bhikkhū dhammasabhāyaṃ kathaṃ samuṭṭhāpesuṃ āvuso duṭṭhalicchavikumāraṃ suciraṃpi ovaditvā neva mātāpitaro na ñātimittādayo dametuṃ sakkhiṃsu sammāsambuddho pana taṃ ekovādeneva dametvā nibbisevanaṃ katvā mattavaravāraṇaṃ viya samuggahitāṇañchakāraṇaṃ akāsi yāva subhāsitañcidaṃ hatthidamakena bhikkhave hatthidammo sārito ekaṃyeva disaṃ dhāvati puratthimaṃ vā pacchimaṃ vā uttaraṃ vā dakkhiṇaṃ vā assadamakena .pe. Goṇadamekena .pe. Dakkhiṇaṃ vā tathāgatena bhikkhave arahatā sammāsambuddhena purisadammo sārito aṭṭha disā vidhāvati rūpī rūpāni passati ayameva tādiso .pe. So vuccati yoggācariyānaṃ anuttaro purisadammasārathīti na hi āvuso sammāsambuddhena sadiso purisadammasārathi nāma atthīti. Satthā āgantvā kāya nuttha bhikkhave etarahi kathāya sannisinnāti pucchitvā imāya nāmāti vutte na bhikkhave idānevesa mayā ekovādena damito pubbepāhaṃ imaṃ ekovādeneva Damesinti vatvā atītaṃ āhari.
Atīte bārāṇasiyaṃ brahmadatte rajjaṃ kārente bodhisatto udiccabrāhmaṇakule nibbattitvā vayappatto takkasilāyaṃ tayo vede sabbasippāni ca uggahetvā kiñci kālaṃ gharāvāsaṃ vasitvā mātāpitūnaṃ accayena isipabbajjaṃ pabbajitvā abhiññā ca samāpattiyo ca nibbattetvā himavante vāsaṃ kappesi. Tattha ciraṃ vasitvā loṇambilasevanatthāya janapadaṃ gantvā bārāṇasiṃ patvā rājuyyāne vasitvā punadivase sunivattho supāruto tāpasākappasampanno bhikkhāya nagaraṃ pavisitvā rājaṅgaṇaṃ pāpuṇi.
Rājā sīhapañjarena olokento taṃ disvā iriyāpathe pasīditvā ayaṃ tāpaso santinduriyo santamānaso yugamattadasso padavāre padavāre sahassathavikaṃ ṭhapento viya sīhavijambhitena āgacchati sace santadhammo nāmeko atthi imassa tena abbhantare bhavitabbanti cintetvā ekaṃ amaccaṃ olokesi. So kiṃ karomi devāti āha. Etaṃ tāpasaṃ ānehīti. So sādhu devāti bodhisattaṃ upasaṅkamitvā vanditvā hatthato bhikkhābhājanaṃ gahetvā kiṃ mahāpuññāti vutte bhante rājā taṃ pakkosatīti āha. Bodhisatto na mayaṃ rājakulupakā himavantakā nāmamhāti āha. Amacco gantvā tamatthaṃ rañño ārocesi. Rājā añño amhākaṃ kulupako natthi ānehi nanti āha. Amacco gantvā bodhisattaṃ vanditvā yācitvā rājanivesanaṃ pavesesi. Rājā bodhisattaṃ vanditvā Samussitasetacchatte kāñcanapallaṅke nisīdāpetvā attano paṭiyattaṃ nānaggarasabhojanaṃ bhojetvā kahaṃ bhante vasathāti pucchi. Himavantakā mayaṃ mahārājāti. Idāni kahaṃ gacchathāti. Vassārattānurūpaṃ senāsanaṃ upadhārema mahārājāti. Tenahi bhante amhākaññeva uyyāne vasathāti paṭiññaṃ gahetvā sayampi bhuñjitvā bodhisattaṃ ādāya uyyānaṃ gantvā paṇṇasālaṃ māpetvā rattiṭṭhānadivāṭṭhānāni kāretvā pabbajitaparikkhāre datvā uyyānapālaṃ paṭicchāpetvā nagaraṃ pāvisi.